شکیب جلالی

گزرا ہے دل سے جو رمِ آہو سا اک خیال
لازم ہے اس کے پاؤں میں زنجیر ڈالیے
یہ کہر کا ہجوم درِ دل پہ تابہ کے
بام یقیں سے ایک نظر اس پہ ڈالیے
احساس میں رچائیے قوسِ قزح کے رنگ
ادراک کی کمند ستاروں پہ ڈالیے

فارغ بخاری

ان سر پھری ہواؤں سے کچھ آشنا تو ہوں
گہرے سمندروں میں نہ کشتی کو ڈالیے
خود ہی اٹھائیں اپنے جنوں کی جراحتیں
یہ روگ دوسروں کے نہ کھاتے میں ڈالیے
پہلے یہ کوہسار تو تسخیر کیجیے
فارغؔ ابھی فلک پہ کمندیں نہ ڈالیے

قتیل شفائی

تہہ میں جو رہ گئے وہ صدف بھی نکالئے
طغیانیوں کا ہاتھ سمندر میں ڈالیے
دنیا کی نفرتیں مجھے قلاش کر گئیں
اک پیار کی نظر مرے کاسے میں ڈالیے