مرزا غالب

خط عارض سے ، لکھا ہے زلف کو الفت نے عہد
یک قلم منظور ہے ، جو کچھ پریشانی کرے

داغ دہلوی

بزم سے اٹھنے کی غیرت بیٹھنے سے دل کو رشک
دیکھ کر غیروں کا مجمع کیا پریشانی ہوئی

مصحفی غلام ہمدانی

ژالہ ساں کیوں کر گھلے جاویں نہ ہم
ہے جو آنسو میں پریشانی صریح

فیض احمد فیض

کس شہر نہ شہرہ ہوا نادانی دل کا
کس پر نہ کھلا راز پریشانی دل کا

یگانہ چنگیزی

جوشِ وحشت میں زمیں پر پاؤں پڑھنے کا نہیں
لے اڑے گی نکہتِ گل کی پریشانی مجھے

جگر مراد آبادی

مزاج اہلِ دل بے کیف و مستی رہ نہیں سکتا
کہ جیسے نکہتِ گل سے پریشانی نہیں جاتی

قمر جلالوی

نشاں کیونکر مٹا دیں یہ پریشانی نہیں جاتی
بگولوں سے ہماری قبر پہچانی نہیں جاتی

عرفان صدیقی

یہاں کس کو خبر ہو گی غبارِ شہ سواراں میں
میں خوشبو ہی سہی میری پریشانی سے کیا ہو گا
کل بگولے کی طرح اس کا بدن رقص میں تھا
کس قدر خوش تھی مری خاک پریشانی پر
دیکھیے خون میں کیا اٹھتا ہے طغیانی سا
سر پہ چھایا تو ہے کچھ ابر پریشانی سا

مصطفی زیدی

اس قدر اب غمِ دوراں کی فراوانی ہے
تو بھی منجملۂ اسباب پریشانی ہے

جمال احسانی

کسی بھی وقت بدل سکتا ہے لمحہ کوئی
اس قدر خوش بھی نہ ہو میری پریشانی پر
اس نے بارش میں بھی کھڑکی کھول کے دیکھا نہیں
بھیگنے والوں کو کل کیا کیا پریشانی ہوئی

احسان دانش

بخش دی حالِ زبوں نے جلوہ سامانی مجھے
کاش مل جائے زمانے کی پریشانی مجھے
اے نگاہِ دوست اے سرمایہ دار بے خودی
ہوش آتا ہے تو ہوتی ہے پریشانی مجھے

اکبر معصوم

خواب آرام نہیں خواب پریشانی ہے
میرے بستر میں اذیت کی فراوانی ہے

عبید اللہ علیم

صبح کھلنے کی ہو یا شام بکھر جانے کی
ہم نے خوشبو ہی کیا اپنی پریشانی کو

علی سردار جعفری

پریشاں روزگار آشفتہ حالاں کا مقدر ہے
کہ اس زلفِ پریشاں کی پریشانی نہیں جاتی

تلوک چند محروم

ابتدائے عشق گیسو میں نہ تھیں یہ الجھنیں
بڑھتے بڑھتے بڑھ گئی آخر پریشانی مری

حفیظ جالندھری

باندھ کر روزِ ازل شیرازۂ مرگ و حیات
سونپ دی گویا دو عالم کی پریشانی مجھے

سیماب اکبر آبادی

پھول کے پتے بکھر کر اک فسانہ کہہ گئے
جس کی ہو ترتیب ممکن وہ پریشانی نہیں