مرزا غالب

وحشت آتشِ دل سے ، شبِ تنہائی میں
صورتِ دود ، رہا سایہ گریزاں مجھ سے
باندھ کر عہدِ وفا اتنا تنفر، ہے ہے
تجھ سے بے مہر کم اے عمرِ گریزاں! ہوں گے

فیض احمد فیض

غم بہ دل، شکر بہ لب، مست و غزل خواں چلیے
جب تلک ساتھ ترے عمرِ گریزاں چلیے

جون ایلیا

باوجود ان کی دل نوازی کے
دل گریزاں ہے کیا کیا جائے

عرفان صدیقی

رات پھر جمع ہوئے شہر گریزاں والے
وہی چہرے تھے مرے دیدہِ حیراں والے
یہ جوئے تنک آب ہمیں راس نہ آ جائے
موقع ہے ابھی ابرِ گریزاں کے لیے بھی

مصطفی زیدی

کوئی باقی نہیں اب ترکِ تعلق کے لیے
وہ بھی جا کر صف احباب گریزاں سے ملا

ضیا جالندھری

پاؤں تھکن سے چور ہیں لیکن دل میں شعلۂ امکاں ہے
میرے لیے اک کربِ مسلسل تیرا جمال گریزاں ہے

ظہیر کاشمیری

اب ہے کیا لاکھ بدل چشم گریزاں کی طرح
میں ہوں زندہ ترے ٹوٹے ہوئے پیماں کی طرح
ہجر کے دور میں ہر دور کو شامل کر لیں
اس میں شامل یہی اک عمرِ گریزاں کیوں ہے
ہم راہ لطف چشم گریزاں بھی آئے گی
وہ آئیں گے تو گردشِ دوراں بھی آئے گی

علی سردار جعفری

رسم دیرینۂ عالم کو بدلنے کے لیے
رسم دیرینۂ عالم سے گریزاں چلیے
کبھی خنداں کبھی گریاں کبھی رقصا چلیے
دور تک ساتھ ترے عمرِ گریزاں چلیے

جوش ملیح آبادی

بڑھتا چلا گیا ہوں انہی کی طرف کچھ اور
یوں بھی ہوا ہوں ان سے گریزاں کبھی کبھی

حفیظ ہوشیارپوری

اب تو مجبور ہیں پر حشر کا دن آنے دے
تجھ سے انصاف طلب روئے گریزاں ہوں گے

شکیل بدایونی

ہوں ان کے سامنے مگر ان پر نظر نہیں
سعی طلب ہے عزم گریزاں لیے ہوئے

عزیز حامد مدنی

وداع شب بھی ہے اور شمع پر اک بانکپن بھی ہے
حدیث شوق بھی ہے قصۂ عمرِ گریزاں بھی
سلگ رہا ہے افق بجھ رہی ہے آتش مہر
رموز ربط گریزاں کھلے تو بات چلے

شاذ تمکنت

شکر کرم بھی شکوۂ غم بھی سارے عنواں آپ ہوئے
مجھ پہ توجہ آپ نے کی تھی مجھ سے گریزاں آپ ہوئے

قابل اجمیری

ہم نے دیے ہیں عشق کو تیور نئے نئے
ان سے بھی ہو گئے ہیں گریزاں کبھی کبھی