مرزا غالب

اک کھیل ہے اورنگِ سلیماں مرے نزدیک
اک بات ہے اعجاز مسیحا مرے آگے

بہادر شاہ ظفر

گرچہ مشکل ہے بہت میرا علاج دردِ دل
پر جو تو چاہے تو اے رشک مسیحا سہل ہے

حیدر علی آتش

اے نورِ نظر معجزۂِ حسن سے تیرے
اندھے بھی کہیں گے کہ مسیحا ہے تو یہ ہے
سامری چشمِ فسوں گر کی فسوں سازی سے
لب جاں بخش کے ہونے سے مسیحا ہے وہ رخ

مصحفی غلام ہمدانی

اک ٹھوکر میں مردے ہزاروں اٹھ بیٹھیں ہیں گور سے ووہیں
لیتا ہے وہ وقت خرامش پانو سے اپنے کار مسیحا

مومن خان مومن

زندگیِ ہجر بھی اک موت تھی
مرگ نے کیا کار مسیحا کیا

جون ایلیا

اک سایہ مرا مسیحا تھا
کون جانے وہ کون تھا کیا تھا
سوچا ہے کہ اب کار مسیحا نہ کریں گے
وہ خون بھی تھوکے گا تو پروا نہ کریں گے
یہ بستی ہے مسلمانوں کی بستی
یہاں کار مسیحا کیوں کریں ہم
کب کا روگی ہوں ویسے
شہر مسیحا لگتا ہوں

زہرا نگاہ

جاں دیتے ہیں جاں دینے کا سودا نہیں کرتے
شرمندۂ اعجاز مسیحا نہیں ہوتے

جلیل مانک پوری

حسن و الفت میں خدا نے ربط پیدا کر دیا
دردِ دل مجھ کو دیا تم کو مسیحا کر دیا

فانی بدایونی

نگۂ ناز کو آساں دمِ خنجر بننا
لب جاں بخش کو دشوار مسیحا ہونا

شاذ تمکنت

پیاسا ہوں ریگ زار میں دریا دکھائی دے
جو حال پوچھ لے وہ مسیحا دکھائی دے

محبوب خزاں

تم زلیخا نہیں کہ ہم سے کہو
ہم مسیحا نہیں کہ تم سے کہیں