ضیا جالندھری

ہم صفیران چمن یاد تو کرتے ہوں گے
پر قفس تک نہیں آتیں وہ صدائیں بابا

ظہیر کاشمیری

اب مری یاد کو دامن کی ہوائیں دینا
میں گیا وقت ہوں مجھ کو نہ صدائیں دینا
یاد آتے ہیں جوانی کے جنوں خیز ایام
مضطرب ہو کے بیاباں کو صدائیں دینا

ماجد صدیقی

یہ ان لبوں ہی تلک ہے ابھی ضیا جن کی
بنیں گی نور کے سوتے یہی صدائیں کبھی

احمد فراز

صحرائے زندگی میں کوئی دوسرا نہ تھا
سنتے رہے ہیں آپ ہی اپنی صدائیں ہم
شعلہ تھا جل بجھا ہوں ہوائیں مجھے نہ دو
میں کب کا جا چکا ہوں صدائیں مجھے نہ دو
ایسا نہ ہو کبھی کہ پلٹ کر نہ آ سکوں
ہر بار دور جا کے صدائیں مجھے نہ دو

نوح ناروی

یہی کہتا ہے سن سن کر وہ اہلِ غم کے نالوں کو
فقیروں کی صدائیں بھی قیامت ہیں قیامت ہیں
چلو رندوں بڑھو آؤ پیو پھر فصلِ گل آئی
یہ ساقی کی صدائیں بھی قیامت ہیں قیامت ہیں