مرزا غالب

ہر اک مکان کو ہے مکیں سے شرف اسدؔ
مجنوں جو مر گیا ہے تو جنگل اداس ہے

باقی صدیقی

کل ان کی بزم میں گزری ہے تم پہ کیا باقیؔ
کہ شاد شاد گئے اور اداس اداس آئے

شکیب جلالی

کسی کی آس تو ٹوٹی‘ کوئی تو ہار گیا
کہ نیم باز دریچوں میں روشنی ہے اداس

عرفان صدیقی

نہ جانے اتنے وفا ناشناس کیسے ہوئے
تمہارے ہوتے ہوئے ہم اداس کیسے ہوئے

ظہیر کاشمیری

عشق جب تک نہ آس پاس رہا
حسن تنہا رہا اداس رہا
وہ جسے تیرا مستقل غم ہے
تیری محفل میں بھی اداس رہا

غلام محمد قاصر

تیری گلی میں ٹوٹ گئے سب جرم و سزا کے پیمانے
ایک تبسم دیکھنے والا ساری عمرِ اداس رہا

رسا چغتائی

کیا بتاؤں سبب اداسی کا
بے سبب میں اسے اداس کیا

سیف الدین سیف

حسن جلوہ دکھا گیا اپنا
عشق بیٹھا رہا اداس کہیں

احمد فراز

عجیب رت تھی کہ ہر چند پاس تھا وہ بھی
بہت ملول تھا میں بھی، اداس تھا وہ بھی

محسن نقوی

میں چپ رہا کہ زہر یہی مجھ کو راس تھا
وہ سنگ لفظ پھینک کے کتنا اداس تھا

ناصر کاظمی

مجھے یہ ڈر ہے تری آرزو نہ مٹ جائے
بہت دنوں سے طبیعت مری اداس نہیں
رنگ صبحوں کے راگ شاموں کے
جیسے سپنا کوئی اداس اداس
مل ہی جائے گا رفتگاں کا سراغ
اور کچھ دن پھرو اداس اداس
کل جنہیں زندگی تھی راس بہت
آج دیکھا انہیں اداس بہت