مرزا غالب

مے نے کیا ہے حسنِ خود آرا کو بے حجاب
اے شوق یاں اجازتِ تسلیمِ ہوش ہے
ساقی بہ جلوہ دشمنِ ایمان و آ گہی
مطرب بہ نغمہ رہزنِ تمکین و ہوش ہے

داغ دہلوی

پائی مرے سراغ سے دشمن نے راہ دوست
اے بیخودی مجھے نہ رہا ہوش نقشِ پا

مصحفی غلام ہمدانی

آتا ہے مجھے مصحفیؔ دل اپنے پہ رونا
افسوس ہے یوں غش سے وہ آ ہوش میں مر جائے

یگانہ چنگیزی

فکر انجام نہ آغاز کا کچھ ہوش رہا
چار دن تک تو جوانی کا عجب جوش رہا
موسمِ گل کی ہوا داروئے بے ہوشی تھی
سر اٹھانے کا بھی سبزے کو نہ کچھ ہوش رہا
سایۂ دامن قاتل میں جو نیند آئی مجھے
پھر تو کروٹ بھی بدلنے کا نہ کچھ ہوش رہا
پھر گئیں آنکھیں مری کوچۂ جاناں کی طرف
شکر ہے مرتے دم اتنا تو مجھے ہوش رہا

سیماب اکبر آبادی

زندگی تجھ سے عبارت تھی مگر جب تو نہیں
زندگی کا اپنی کس کو ہوش ہے تیرے بغیر

شان الحق حقی

ہر چند کہ ساغر کی طرح جوش میں رہئے
ساقی سے ملے آنکھ تو پھر ہوش میں رہئے

قتیل شفائی

بے آبرو نہ تھی کوئی لغزش مری قتیلؔ
میں جب گرا جہاں بھی گرا ہوش میں گرا