مرزا غالب

فریاد کی کوئی لے نہیں ہے
نالہ پابندِ نے نہیں ہے

مصطفٰی خان شیفتہ

کچھ درد ہے مطربوں کی لے میں
کچھ آگ بھری ہوئی ہے نے میں

جگر مراد آبادی

پھر اس کے دیکھنے کو آنکھیں ترس رہی ہیں
یادش بخیر جس نے دیوانہ کر دیا ہے
مجھ سے ہی پوچھتے ہیں یہ شوخیاں تو دیکھو
میرے جگرؔ کو کس نے دیوانہ کر دیا ہے

مجید امجد

جو میرے کنجِ دل میں گونجتے ہیں
نہیں دیکھے وہ دنیا نے زمانے

ادا جعفری

کوئی خبر بھی نہ بھیجی بہار نے آتے
کہ ہم بھی قسمت مژگاں سنوارنے آتے

غلام محمد قاصر

ہم نے تو بے شمار بہانے بنائے ہیں
کہتا ہے دل کہ بت بھی خدا نے بنائے ہیں
بھونرے انہی پہ چل کے کریں گے طواف گل
جو دائرے چمن میں صبا نے بنائے ہیں
آج اس بدن پہ بھی نظر آئے طلب کے داغ
دیوار پر بھی نقشِ وفا نے بنائے ہیں

شان الحق حقی

کر کے اک بار تری چشمِ فسوں گر کے سپرد
پھر نہ پوچھا کبھی بندوں کو خدا نے اپنے

احمد فراز

کاش تو بھی میری آواز کہیں سنتا ہو
پھر پکارا ہے تجھے دل کی صدا نے میرے
کاش اوروں کی طرح میں بھی کبھی کہہ سکتا
بات سن لی ہے مری آج خدا نے میرے
تو ہے کس حال میں اے زود فراموش مرے
مجھ کو تو چھین لیا عہدِ وفا نے میرے

شاذ تمکنت

بادباں اپنے سفینہ کا ذرا سی لیتے
وقت اتنا بھی زمانہ کی ہوا نے نہ دیا
وہی انعام زمانہ سے جسے ملنا تھا
لوگ معصوم ہیں کہتے ہیں خدا نے نہ دیا

قابل اجمیری

ہمارے دیدۂ بے خواب کو تسکین کیا دو گے
ہمیں لوٹا ہے دنیا نے ستارو تم تو سو جاؤ

ناصر کاظمی

تو اسیرِ بزم ہے ہم سخن تجھے ذوقِ نالہِ نے نہیں
ترا دل گداز ہو کس طرح یہ ترے مزاج کی لے نہیں