مرزا غالب

پھر ہوئے ہیں گواہِ عشق طلب
اشک باری کا حکم جاری ہے

امام بخش ناسخ

ہجر میں صبح سے تا شام بجائے شبنم
میری آنکھوں سے لہو رکھتی ہیں جاری راتیں
اس لیے اشک بہاتا ہوں دم فکرِ سخن
کہ ہمیشہ رہیں دنیا میں یہ جاری باتیں

حیدر علی آتش

رواج عشق کے آئیں وہی ہیں کشور دل میں
رہ و رسمِ وفا جاری جو آگے تھی سو اب بھی ہے

عرفان صدیقی

یہ زمیں پھر پاؤں کی زنجیر ہو جانے کو ہے
وحشتیں اب کوئی فرمانِ سفر جاری کریں
ہم تو صحرا ہوئے جاتے تھے کہ اس نے آ کر
شہر آباد کیا‘ نہرِ صبا جاری کی
عالم عالم دھوم مچی ہے انؐ کے لطف و عنایت کی
بستی بستی، صحرا صحرا فیض کا دریا جاری ہے

علی سردار جعفری

لمحہ لمحہ ہے کہ ہے قافلۂ منزل نور
سرحد شب میں بھی فرمان سحر ہے جاری

عزیز حامد مدنی

ناوک تازہ دل پر مارا جنگ پرانی جاری کی
آج ہوا نے زخمِ کہن میں ڈوب کے تازہ کاری کی

اختر ہوشیارپوری

وہ رتجگاتھا کہ افسون خواب طاری تھا
دیئے کی لو پہ ستاروں کا رقص جاری تھا

کلیم عاجز

یہ آنسو بے سبب جاری نہیں ہے
مجھے رونے کی بیماری نہیں ہے