مرزا غالب

دیکھنا حالت مرے دل کی ہم آغوشی کے وقت
ہے نگاہ آشنا تیرا سر ہر مو مجھے
کہتے تو ہو تم سب کہ بتِ غالیہ مو آئے
یک مرتبہ گھبرا کے کہو کوئی کہ وہ آئے

حیدر علی آتش

لے جا چکی چمن میں صبا بوئے زلفِ یار
سنبل کے سلسلے کو بھی برہم وہ مو کریں
ہمیشہ رنگ زمانہ بدلتا رہتا ہے
سفید رنگ ہیں آخر سیاہ مو کرتے

شیخ ابراہیم ذوق

شدت گریہ سے تھا رات یہ اشکوں کا ہجوم
چشمِ تر پھر مرے مژگاں کے ہیں مو ٹوٹ گئے
بڑھتے بڑھتے بڑھ گئی وحشت وگرنہ پہلے تو
ہاتھ کے ناخن بڑھے سر کے ہمارے مو بڑھے

مصحفی غلام ہمدانی

گر تو سنے تو سلسلۂِ زلف کے اسیر
شرحِ نیاز مندی دل مو بہ مو کریں
حلقے نہیں یہ زلف میں ساقی کی بلکہ ہے
وابستہ مو بہ مو سے قدح اور قدح سے ہم
گر جعد کو سنبل کی صبا بیچنے لاوے
خاطر سے تری قیمت یک مو نہ کروں میں

مصطفٰیٰ خان شیفتہ

یہ پیچ و تاب میں شبِ غمِ بے حواسیاں
اے دل! خیالِ طرہ تابیدہ مو نہیں

جون ایلیا

حسن مغموم تمکنت میں تری
فرق آیا نہ یک سرِ مو بھی

بیخود بدایونی

اک ترا ربط کہ دو دن کبھی یکساں نہ رہا
اک مرا حال کہ ہرگز نہ سر مو بدلا

شاد عظیم آبادی

پھنسنے والا تھا پھنسا آ کے تری زلفوں میں دل
بہ خدا اس میں نہیں جرم سرِ مو اپنا

احمد فراز

دل کو ہم چھوڑ کے دنیا کی طرف آئے تھے
یہ شبستاں بھی اسی غالیہ مو کا نکلا
پھرے گا تو بھی یونہی کو بکو ہماری طرح
دریدہ دامن و آشفتہ مو ہماری طرح