مرزا غالب

صحبت میں غیر کی نہ پڑی ہو کہیں یہ خو
دینے لگا ہے بوسہ بغیر التجا کیے

داغ دہلوی

اس جفا پر تمہیں تمنا ہے
کہ مری التجا کرے کوئی
مانگی نہ ہو گی خضر نے یوں عمرِ جاوداں
کیا اپنی موت مانگتے ہیں التجا سے ہم

مصحفی غلام ہمدانی

کبھو کام اپنا کسی سے نہ نکلا
بہت خلق کی التجا کر چکے ہم

مصطفٰی خان شیفتہ

اے جوشِ رشکِ قربِ عدو، اب تو مت اٹھا
بیٹھے ہیں دیکھ بزم میں کس التجا سے ہم

میر مہدی مجروح

غیر کی پاسباں کی درباں کی
کس کی جا جا کے التجا کیجے

فیض احمد فیض

ہمت التجا نہیں باقی
ضبط کا حوصلہ نہیں باقی

یگانہ چنگیزی

موت بھی آ سکی نہ منہ مانگی
اور کیا التجا کرے کوئی

جون ایلیا

کوہ کن کو ہے خودکشی خواہش
شاہ بانو سے التجا کیجے

سراج الدین ظفر

میں جو حریمِ ناز میں شمع صفت خموش ہوں
اس کو بھی اے نگاہِ لطف کوشش التجا سمجھ

مصطفی زیدی

ہماری خیر مناؤ کہ آج خود اس نے
بڑے خلوص بڑی التجا سے باتیں کیں

احسان دانش

یہ پچھلی رات یہ خاموشیاں یہ ڈوبتے تارے
نگاہِ شوق بہکی پھر رہی ہے التجا ہو کر

فارغ بخاری

یہ فخر کم نہیں فارغ ہے دل غریب تو کیا
کہ آبرو تو نہیں کھوئی التجا کر کے

حسرت موہانی

حسنِ خود ہو گیا غریب نواز
عشق محتاج التجا نہ رہا
لطف کی ان سے التجا نہ کریں
ہم نے ایسا کبھی کیا نہ کریں
جب ان سے ادب نے نہ کچھ منہ سے مانگا
تو اک پیکر التجا ہو گئے ہم

شاد عظیم آبادی

تھا بھی ذلیل حسن کی سرکار میں یہ دل
کم بخت کو سپرد ہوا التجا کا کام

شکیل بدایونی

مجھے دوست کہنے والے ذرا دوستی نبھا دے
یہ مطالبہ ہے حق کا کوئی التجا نہیں ہے
نگاہ و دل سے اب تفسیر و شرح آرزو ہو گی
زبان و لب سے ترک التجا کرنے کا وقت آیا

فانی بدایونی

چلے بھی آؤ کہ دنیا سے جا رہا ہے کوئی
سنو کہ پھر نہ سنوگے تم التجا میری
محبت کو رسوا کیا چاہتا ہوں
نظر محرم التجا چاہتا ہوں

احمد فراز

غرورِ دوست سے اتنا بھی دلِ شکستہ نہ ہو
پھر اس کے سامنے دامانِ التجا لے جا

قتیل شفائی

زمانہ دیکھ چکا ہے پرکھ چکا ہے اسے
قتیلؔ جان سے جائے پر التجا نہ کرے

محسن احسان

اسے پکار چکا زندگی میں ہار چکا
مرا خدا تھا تو پھر میری التجا سنتا