چاہے تم میری بینائی کھرچ ڈالو پھر بھی اپنے خواب نہیں چھوڑوں گا

تیز نظر نا بیناؤں کی آبادی میں

ہاں میرے خوابوں کو تمہاری صبحوں کی سرد اور سایہ گوں تعبیروں سے نفرت ہے

وہ سب اک برفانی بھاپ کی چمکیلی اور چکر کھاتی گولائی تھے

ایسی یخ بستہ تعبیروں کے ہر دن سے اچھی ہیں اور سچی بھی ہیں

میرے اندھیرے بھی سچے ہیں

راتیں سچی ہیں دن جھوٹے

راتیں سہنا اور اپنے خوابوں میں رہنا

ہاں میں بہکاووں کی دھند نہیں اوڑھوں گا

اپنا عہد نہیں توڑوں گا

ماہ و سال کے غارت گر سے میری ٹھنی ہے

چاہے کچھ ہو میرے آخری سانس تلک اب چاہے کچھ ہو