خیمہِ گل کے پاس ہی‘ دجلہِ خوں بھی چاہیے
شکیب جلالی
موجِ صبا رواں ہوئی‘ رقصِ جنوں بھی چاہیے
خیمہِ گل کے پاس ہی‘ دجلہِ خوں بھی چاہیے
کشمکشِ حیات ہے ‘ سادہ دلوں کی بات ہے
خواہشِ مرگ بھی نہیں ‘ زہرِ سکوں بھی چاہیے
ضربِ خیال سے کہاں ٹوٹ سکیں گی بیڑیاں
فکرِ چمن کے ہم رکاب‘ جوش جنوں بھی چاہیے
نغمہِ شوق خوب تھا‘ ایک کمی ہے مطربہ!
شعلہِ لب کی خیر ہو‘ سوزِ دروں بھی چاہیے
اتنا کرم تو کیجیے ‘ بجھتا کنول نہ دیجیے
زخمِ جگر کے ساتھ ہی دردِ فزوں بھی چاہیے
دیکھیے ہم کو غور سے ‘ پوچھیے اہلِ جور سے
روحِ جمیل کے لیے ‘ حالِ زبوں بھی چاہیے
مفتَعِلن مفاعِلن مفتَعِلن مفاعِلن
رجز مثمن مطوی مخبون