جا کے دیکھوں تو، کون آیا ہے ؟

رات آئی کہاں بےچارے پر!

کون استادہ ہے تھکا ماندہ؟

یہ مرا ساغرِ شکستہ لو!

اک نئے عزم کی جوانی پیو

جوت سلگا لو اک نئی دل میں

پاؤں کے آبلوں کی مرہم لو

سر سے گٹھڑی اتار دو، بیٹھو

طاق پر کاہشِ سفر رکھ کر

منزلوں کے سپن میں کھو جاؤ

دشت و دریا و آبشار کے خواب

کنجِ صحرا کی خیمہ گاہوں کے

جہاں اک دل تپاں ہے ، سوزاں ہے

اور میں کھیلوں تمہارے بالوں سے

سونی پگڈنڈیوں پہ خوں برسے

تم خبر لو پھر اپنے جادوں کی

اجنبی اجنبی کو یاد رہے

آؤ بھی، کیوں جھجھکتے ہو، آؤ

او مرے میہماں! جواب تو دو

کس کی دستک تھی؟ کون آیا تھا؟

تیز ہرکارے ابر پاروں کے

کوئی جھونکا تھا؟ کوئی دھوکا تھا؟