آج ان کے پاس جاؤں گا ضرور!

ہانپتی پگڈنڈیوں سے دور۔۔۔ دور

میرے نام ان کے بلاوے روز و شب

شوق میں ڈوبے ہوئے پیغام سب

صجدم ان کے ٹھکانوں کی طرف

وہ کھڑے ہیں تیرے ارماں، صف بہ صف!

جگمگا اٹھے فروغِ شام سے

تودۂ خاکسترِ ایام سے

منزلیں جن تک کوئی رستہ نہیں

بستیاں، جن میں کوئی بستا نہیں

میری شرمیلی تمناؤں سے چھیڑ

ٹیکری پر لہلہانے والے پیڑ

آج جا پہنچا میں، جا پہنچا وہاں

خشک شاخیں، کھڑکھڑاتی ٹہنیاں

اپنی جھولی میں لیے پہنائے دشت

ان میں جھونکوں کی صدائے بازگشت

دیکھتا ہوں اور یقیں آتا نہیں

کوئی پیغامِ حسیں آتا نہیں

کوئی آوازِ جرس، کچھ بھی نہیں

رنگ، بو، چھب، روپ، رس، کچھ بھی نہیں

وہ رہا میرا نشیمن، دور ادھر

ٹیکری سے دور ادھر، اک نور ادھر

روشنی۔۔۔ اک گل بداماں روشنی

میری نظروں سے گریزاں روشنی!