آنکھوں میں کوئی بس جاتا ہے

احساس کی لہریں ان تاریک جزیروں سے ٹکراتی ہیں

سنگین فصیلوں کے گنبد سے پہرے دار پکارتے ہیں:

دل ڈرتا ہے

ان سونی تنہا راتوں میں

جب سوچتا ہے ، کیا دیکھتا ہے ، ہرسمت دھوئیں کا بادل ہے

زخار سمندر سوکھے ہیں، پرہول چٹانیں پگھلی ہیں

پہنائے زماں کے سینے پر اک موج انگڑائی لیتی ہے !

اک تھرکن سی، اک دھڑکن سی، آفاق کی ڈھلوانوں میں کہیں

ان راگنیوں کے بھنور بھنور میں صدہا صدیاں گھوم گئیں

اور آج کسے معلوم، ضمیرِ ہستی کا آہنگِ تپاں

اس سانس کی رو تک پہنچا ہے

کون آیا ہے ؟ کون آتا ہے ؟ کون آئے گا؟

دل ڈرتا ہے