میں کھڑا ہوں، تیرے درپر، زندگی

خرقہ پوش و پا بہ گل

زندگی، اے زندگی

سن رہا ہوں قہقہوں کے دھیمے دھیمے زمزمے

گرم، گہری گفتگو کے سلسلے

اور ادھر، باہر گلی میں، خرقہ پوش و پا بہ گل

جس کی ہر دھڑکن میں گونجے دو جہاں کی تیرگی

کتنے سائے محوِ رقص

کتنے سائے ، کتنے عکس

اور اک تو کہنیاں ٹیکے خمِ ایام پر

سن رہی ہے ناچتی صدیوں کا آہنگِ قدم

آنچلوں کی جھم جھماہٹ، پائلوں کی چھم چھمم

ایک طوفاں، ایک سیلِ بے اماں

اے نگارِ دل ستاں

زندگی، اے زندگی!