وہ حالی، عندلیبِ گلشنِ ہندوستاں حالی

حریمِ قدس کا وہ مطربِ شیریں زباں حالی

وہ اسرار و معارف کا محیطِ بیکراں حالی

وہ حالی، ہاں وہی شخصیتِ گردوں نشاں حالی

جسے سرمایۂ سوز و گدازِ زندگی کہہ دیں

بھلا کر قلقلِ وجد آفریں میخانۂ مل کی

حدیثِ دل فروز اسلام کے شان و تجمل کی

دکھائی شان موجِ زندگانی کے تسلسل کی

سنائی داستاں اوضاعِ ملت کے تعطل کی

وہ جس کے شعر سے ہندوستاں میں انقلاب آیا

وہی حالی جو مردوں کو جلانے کے لیے آیا

نئی لے میں اسی نغمے کو گانے کے لیے آیا

خدا کے نام کا ڈنکا بجانے کے لیے آیا

جو ہر انسان کو انساں بنانے کے لیے آیا

سرورِ جاؤدانی ہے ، بہارِ زندگانی ہے

وہی حالی جو ارشاد و ہدایت کے لیے آیا

وہی ناقد جو تبلیغِ صداقت کے لیے آیا

وہ مصلح جو فلاحِ ملک و ملت کے لیے آیا

وہ مردِ حق جو اظہارِ حقیقت کے لیے آیا

وہ جس کے خامۂ سحرآفریں نے گل کھلائے ہیں

نظیر بے نظیری ہے ، مثال بے مثالی ہے

زباں آبِ زلالی ہے ، بیاں سحرِ حلالی ہے

وہ جس کی روح میں سرمستی تخئیل عالی ہے

یقیں رکھو، یقیں رکھو، وہ حالی ہے ، وہ حالی ہے

جبھی تو چار سو شانِ جمالی جلوہ گر سی ہے

جبھی تو آج ہے ہندوستان کی شان دوبالا

جسے دیکھو وہی اس کی محبت میں ہے متوالا

کلامِ حالیِ مرحوم کا ہے پوجنے والا

کلامِ حالیِ مرحوم ہے وہ لولوئے لالا

جو ادبیات میں اک شاہکارِ غیرفانی ہے

ابھی تک مرکزِ تقدیس ہے پیغام حالی کا

زمیں سے آسماں تک غلغلہ ہے عام حالی کا

بڑھا جس منزلِ مقصد کی جانب گام حالی کا

ابھی تک چٹکیاں لیتا ہے دل میں نام حالی کا

ابھی تک کان سنتے ہیں نوائے راز حالی کا

نہیں، سرمطلعِ امید کا خورشید ہے حالی

جہانِ زندگی میں زندۂ جاؤید ہے حالی

اجی! اک آنے والے دور کی تمہید ہے حالی

رہے گا ثبت لوحِ کن فکاں پر نام حالی کا