کیا کہوں، کتنے غموں، کتنے غموں کی شکن آلود بساط

کس طرح بچھتی لپٹتی ہی چلی آئی ہے

یہ مرا قصۂ غم کون سنے ؟ کس کو سناؤں — کس کو

پیتے پیتے مری اک عمر کٹی ہے ، اک عمر

وہ جو اک موڑ ہے اور وہ جو جھروکا ہے سرِ بام بلند

وہ جو جھکتی ہوئی، مڑتی ہوئی دیواریں ہیں

وہ جو ہر شام انھی گلیوں میں کوئی مست سی لے

وہ خموشی، سفرِ شب کے تسلسل کی نقیب

میں نے اک عمر اسی معمورۂ ظلمات میں رقصاں، جولاں

جگرِ جام سے چھینے ہوئے نشوں میں مگن

جس طرح ایک سہارے کی تمنا میں کسی ٹوٹتے تارے کی حیات

خمِ افلاک سے ٹکرا کے بھسم ہو جائے

میں بھی پلکوں پہ امنگوں کے دیے لے کے گرجتے ہوئے طوفانوں میں

آ کے بس جائے کسی نغمۂ شیریں کی بہار!

کب یہاں ریزۂ صد ساغرِ بشکستہ سے کلیاں پھوٹیں

مجھ کو یہ غم ہے وہ اک لمحۂ نایاب کہ جو

جب مری زیست سے ٹکرا کے بھسم ہو بھی گیا تب مجھے معلوم ہوا

اب یہ سب کچھ غمِ جاؤید کی اک دھڑکن ہے

آج بھی جب کہیں رستے میں، کسی موڑ، کسی منزل پر

کوئی دامن کہ جسے نازِ گل افشانی ہے

ایک پل کے لیے اڑتا ہے ، سمٹتا ہے تو دھیرے دھیرے

تارِ بربط کی کوئی لرزشِ پہنانی ہے

آسمانوں سے ، زمینوں سے کسی دل کے دھڑکنے کی صدا آتی ہے

سنتے ہو، کس کی یہ آواز ہے ، پہچانی ہے ؟

بے سود جلیں، ناکام جلیں

میٹھے سپنوں میں کھو جائیں ۔۔۔

تاروں کی نگاہیں جم جائیں

جب آنکھ لگے رکھوالوں کی

دو بھک منگوں کے بھیس میں ہم

کچھ دور، افق کے پار، ادھر

خوشیوں کی، سنگاروں کی دنیا

آج اس فرصتِ یک گام کو روتا ہوں جب اک لغزشِ پا

آہ وہ دنیا جسے کھو کے میں پھر پا نہ سکا

ان خلاؤں میں ستارے بھی ہیں، خورشید بھی ہے ، ماہ بھی ہے

لیکن اک دنیا جسے کھو کے میں پھر پا نہ سکا

میری سم خوردہ تمناؤں کی نظروں سے گریزاں ہی رہی

بوجھ بن کر مری تقدیر کی پلکوں پہ رہا

اب یہ دنیا، یہ صداکوش نصیبوں سے بھرے شہر و دیار

مجھ سے پوچھو تو مرے سامنے اب یہ دنیا

سوچتا ہوں یہی دو گھونٹ جو میں نے خمِ دوراں سے پیے

دوش و فردا کی فصیلوں میں یہی دو رخنے

کیا اسی ساعتِ محرومیِ غم تاب کی خاطر میں نے

لاکھوں دنیاؤں کے لٹتے ہوئے کھلیانوں سے

کیا اسی واسطے ماضی کے یخستانوں سے اک موجِ حیات

آ کے اس ساحلِ گل پوش سے ٹکرائی ہے ؟

کہ جب اس سطحِ خروشندہ پہ ڈھونڈوں میں کوئی رختِ طرب

آسمانوں سے صدا آئے ’’تو کیا ڈھونڈتا ہے

عقلِ حیراں ہے ، یہ طرفہ حجاباتِ حریمِ اسرار

پا بہ زنجیر ارادوں کا خروشِ پیہم

کس کی فتراک میں ہیں عرشِ بریں، فرشِ زمیں؟ کون کہے

جانے کن گہرے دھندلکوں سے ضیا پاتی ہے

اتنے زخموں سے سجا کر دل بے تاب کی پژمردہ جبیں—

یوں نہ اپنے دمِ امید کو بہلائے کوئی

جی میں آئی ہے کہ اک بارغمِ زیست پہ احساں دھر کر

(دیگِ گردوں کہ ابد زنگ شکم میں جس کے

اسی زہراب سے خم بھر کے پٹخ دوں افقِ دوراں پر

اب یہی دھن ہے کہ اس ظلمت بے پایاں کو

اٹھ کے پھیلا دوں انہی اونچے درختوں سے ڈھکی راہوں پر

اب ارادہ ہے کہ ان بس بھرے ارمانوں کو

گھول دوں جھومتے جھونکوں کے چھلکتے ہوئے پیمانوں میں

چاہتا ہوں کہ یہ زیتون کے جنگل کا سکوت

میری کھوئی ہوئی دنیاؤں کے کہرام سے تھرا اٹھے —

تیز جھالوں کے یہ چابک سے کہ جن کی زد پر

یہ دھواں دھوپ ترائی، یہ دھواں دھار پہاڑوں کی فصیل

برف سی بدلیاں، جن کے لبِ تر سے پیوست

ہاں یہ سب سلسلۂ رنگ، یہ گہوارۂ حسن و افسوں—

جن کی لہریں کبھی آنسو ہیں، کبھی آہیں ہیں

کوئی غایت، کوئی منزل، کوئی حاصل سفرِ ہستی کا—

کوئی مشعل بھی نہیں، کوئی کرن بھی تو نہیں

بولو اے نغمہ سرایانِ تحیر کدۂ کاہکشاں