مری محبت جواں رہے گی
ن م راشد
مثالِ خورشید و ماہ و انجم مری مُحبّت جواں رہے گی
عروسِ فطرت کے حسنِ شاداب کی طرح جاوداں رہے گی
شعاعِ امید بن کے ہر وقت روح پر ضَو فِشاں رہے گی
شگفتہ و شادماں کرے گی، شگفتہ و شادماں رہے گی
۔۔مری مُحبّت جواں رہے گی!۔۔
کیا ہے جب سے غمِ مُحبّت نے دیدۂ التفات پیدا
نئے سرے سے ہوئی ہے گویا مرے لیے کائنات پیدا
ہوئی ہے میرے فسُردہ پیکر میں آرزوئے حیات پیدا
یہ آرزو اب رگوں میں میری شراب بن کر رواں رہے گی
۔۔مری مُحبّت جواں رہے گی!۔۔
مجھے مُحبّت نے ذوقِ تقدیس مثلِ رنگِ سحر دیا ہے
زمانہ بھر کی لطافتوں سے مری جوانی کو بھر دیا ہے
مرے گلستاں کو آشنائے بہارِ جاوید کر دیا ہے
مرے گلستاں میں رنگ و نِکہَت کی نُزہتِ جاوداں رہے گی
۔۔مری مُحبّت جواں رہے گی!۔۔