ہم پریشاں ہی رہے اپنے خیالوں کی طرح
سدرشن فاکر
فلسفے عشق میں پیش آئے سوالوں کی طرح
ہم پریشاں ہی رہے اپنے خیالوں کی طرح
شیشہ گر بیٹھے رہے ذکر مسیحا لے کر
اور ہم ٹوٹ گئے کانچ کے پیالوں کی طرح
جب بھی انجام محبت نے پکارا خود کو
وقت نے پیش کیا ہم کو مثالوں کی طرح
ذکر جب ہو گا محبت میں تباہی کا کہیں
یاد ہم آئیں گے دنیا کو حوالوں کی طرح
فاعِلاتن فَعِلاتن فَعِلاتن فِعْلن
رمل مثمن مخبون محذوف مقطوع