بشیر بدر

یوں کسی کی آنکھوں میں صبح تک ابھی تھے ہم
جس طرح رہے شبنم پھول کے پیالوں میں

سدرشن فاکر

شیشہ گر بیٹھے رہے ذکر مسیحا لے کر
اور ہم ٹوٹ گئے کانچ کے پیالوں کی طرح

جلیل مانک پوری

عجیب حسن ہے ان سرخ سرخ گالوں میں
مئے دوآتشہ بھر دی ہے دو پیالوں میں
چبھے گا کیا دل پر خوں کا راز آنکھوں سے
جو ہو گا شیشے میں آئے گا وہ پیالوں میں

عزیز حامد مدنی

سبو میں موجزن آب ضمیر مے گساراں ہے
طلوعِ صبح تک روشن رکھیں گے ہم پیالوں کو

کلیم عاجز

یہ مختصر سی ہے روداد صبح مے خانہ
زمیں پہ ڈھیر تھا ٹوٹے ہوئے پیالوں کا