امام بخش ناسخ

نقرئی پٹھے کا ڈالا نہیں تو نے موباف
ہے سیہ سارا بدن اور دم مار سفید
کیا مار کو نسبت ترے گیسو کے چلن سے
ہے سایۂِ گیسو میں صنم مار کی رفتار
زلف کو چھو کے پڑا ہے جو بلا میں اے دل
کاٹ کھاتا ہے کسی کو کوئی مار آپ سے آپ

بہادر شاہ ظفر

خال عارض دیکھ لو حلقے میں زلفِ یار کے
مار مہرہ گر نہ دیکھا ہو دہن میں مار کے

حیدر علی آتش

زلف کے حلقہ میں الجھا سبزہ گوش یار کا
ہو گیا سنگ زمرد خال چشم مار کا
حلقہ میں زلفِ یار کی موتی پرویے
دنداں ضرور ہیں دہن مار کے لیے

مرزا رفیع سودا

کھینچے تو تیغ ہے حرمِ دل کے صید پر
اے عشقِ پر بھلا تو مجھے مار دیکھنا
اٹھ کر ہمارے پاس سے گھر تک رقیب کے
پہنچے گا وہ کوئی جو ہمیں مار کر چلے
پیارے خدا کے واسطے ٹک اپنے دل کے بیچ
انصاف تو کرو یہ کسے مار کر چلے

باقی صدیقی

حسرت ہے جو نکال لو غصہ اتار لو
بے سدھ پڑا ہوں آخری پتھر بھی مار لو

مصطفیٰ زیدی

ترے خیال پہ شب خوں تو خیر کیا کرتے
بہت ہوا تو اک اوچھا سا ہات مار آئے
نگر نگر میلے کو گئے کون سنے گا تیری پکار
اے دل اے دیوانے دل! دیواروں سے سر دے مار
ناوک ظلم اٹھا دشنۂ اندوہ سنبھال
لطف کے خنجر بے نام سے مت مار مجھے

عبید اللہ علیم

کچھ عشق تھا کچھ مجبوری تھی سو میں نے جیون وار دیا
میں کیسا زندہ آدمی تھا اک شخص نے مجھ کو مار دیا

اختر امام رضوی

وہ خود تو مر ہی گیا تھا مجھے بھی مار گیا
وہ اپنے روگ مری روح میں اتار گیا

شاد عظیم آبادی

عدم میں شادؔ کو کیا ولولہ ہو جنت کا
کہ یہ غریب تو ہستی سے دل کو مار آیا

احمد فراز

ہم تو چاہت میں بھی غالبؔ کے مقلد ہیں فرازؔ
جس پہ مرتے ہیں اسے مار کے رکھ دیتے ہیں