امام بخش ناسخ

رفتار ناز میں یہ لچک جاتی ہے کہ بس
گویا تری کمر میں صنم استخواں نہیں
جن کے سروں پر آپ مگس راں رہے ہما
ان کا لحد میں آج کوئی استخواں نہیں

بہادر شاہ ظفر

سناؤ دردِ دل اپنا تو دم بہ دم فریاد
مثال نے مری ہر ایک استخواں سے سنو

حیدر علی آتش

حکمت سے ہے یہ خاک کا پتلا بنا ہوا
نور آنکھ میں ہے اس کے تو مغز استخواں میں ہے
سعادت مند قسمت پر ہیں شاکر
ہما کو مغز بادام استخواں ہے
خوش چشموں کے فراق میں کھائے یہ پیچ و تاب
شاخ غزال اپنا ہر اک استخواں ہوا
تپ ہجر کی کاہشوں نے کیے ہیں
جدا پوست سے استخواں کیسے کیسے

داغ دہلوی

نہ ہوں گے سوزِ محبت کے دل جلے ٹھنڈے
بھری ہے آتشِ غم مغز استخواں کی طرح

مصحفی غلام ہمدانی

خوان قسمت کے حاشیے پہ جلیں
کبھی یہ مشتِ استخواں بھی تھا
دعوت تیغ کے تو قابل ہیں
گو کہ یک مشتِ استخواں ہیں ہم
جدائی میں اس زلف کی مثل شانہ
مری انگلیاں استخواں ہو گئی ہیں
اے ہما! اور کھانے تھے مردے
میرے ہی استخواں کو کیوں چھیڑا
عاشق کا ترے ہمارے غم نے
چھوڑا نہ بدن میں استخواں ایک
لگا دیتا ہے ان کو چن کے آتش
ہما کر کے ہمارے استخواں جمع

میر انیس

ابتدا سے ہم ضعیف و ناتواں پیدا ہوئے
اڑ گیا جب رنگِ رخ سے استخواں پیدا ہوئے
احتیاط جسم کیا انجام کو سوچو انیسؔ
خاک ہونے کو یہ مشتِ استخواں پیدا ہوئے