مرزا غالب

گو نہ سمجھوں اس کی باتیں، گونہ پاؤں اس کا بھید
پر یہ کیا کم ہے ؟ کہ مجھ سے وہ پری پیکر کھلا

جون ایلیا

جانی میں تیرے ناف پیالے پہ ہوں فدا
یہ اور بات ہے ترا پیکر بھی کچھ نہیں

شکیب جلالی

اپنے حق میں وہی تلوار بنا
جسے اک پھول سا پیکر جانا
اس بت کدے میں تو جو حسیں تر لگا مجھے
اپنے ہی اک خیال کا پیکر لگا مجھے

عرفان صدیقی

یہ خون میں اک لہر سی کیا دوڑ رہی ہے
سایہ جسے سمجھے تھے وہ پیکر تو نہیں تھا
اس سے بچھڑے تو تمہیں کوئی نہ پہچانے گا
تم تو پرچھائیں ہو، پیکر کی طرف لوٹ چلو
تم سرِ دشت و چمن مجھ کو کہاں ڈھونڈتے ہو
میں تو ہر رت میں بدل دیتا ہوں پیکر اپنے

رئیس فروغؔ

کوئی جاگیریں کوئی زر چاہے
دل پیار بھرا پیکر چاہے

فارغ بخاری

دیکھ کر اس حسین پیکر کو
نشہ سا آ گیا سمندر کو

اختر ہوشیارپوری

جنبش لب میں مری آواز کی تصویر ہے
کاش وہ بھی بولتے لفظوں کے پیکر دیکھتے

افضل منہاس

جب بھی چاہا ہے کہ ملبوس وفا کو چھو لیں
مثل خوشبو کوئی اڑتا ہوا پیکر دیکھا

شاذ تمکنت

کچھ دے سکو اگر تو کوئی خواب سونپ دو
سایہ تلاش کرتا ہوں پیکر مجھے نہ دو
ردائے رنگ سے چھنتا ہوا بدن تیرا
یہ چاندنی کہ تمازت ہے تیرے پیکر کی

کیف بھوپالی

تھوڑا سا عکس چاند کے پیکر میں ڈال دے
تو آ کے جان رات کے منظر میں ڈال دے