امام بخش ناسخ

ساغرِ چشم سے ہم بادہ پرست
مئے دیدار پیا کرتے ہیں

مصطفٰیٰ خان شیفتہ

دستِ عدو سے شب جو وہ ساغر لیا کیے
کن حسرتوں سے خون ہم اپنا پیا کیے

جون ایلیا

مجھ سے کہتی تھیں وہ شراب آنکھیں
آپ وہ زہر مت پیا کیجے

الطاف حسین حالی

کہہ دو کوئی ساقی سے کہ ہم مرتے ہیں پیاسے
گر مے نہیں دے زہر ہی کا جام بلا سے
ہے وصل تو تقدیر کے ہاتھ اے شہ خوباں
یاں ہیں تو فقط تیری محبت کے ہیں پیاسے

سدرشن فاکر

زندگی تجھ کو جیا ہے کوئی افسوس نہیں
زہر خود میں نے پیا ہے کوئی افسوس نہیں

ماجد صدیقی

ہم کہ شیرینی لب جن سے ہے ماجدؔ منسوب
کون جانے کہ ہمیں زہر پیا کرتے ہیں

احمد فراز

ہم دشت تھے کہ دریا ہم زہر تھے کہ امرت
ناحق تھا زعم ہم کو جب وہ نہیں تھا پیاسا
اے مرے ابرِ گریزاں کب تک
راہ تکتے رہیں پیاسے تیری
اب کیا سوچیں کیا حالات تھے کس کارن یہ زہر پیا ہے
ہم نے اس کے شہر کو چھوڑا اور آنکھوں کو موند لیا ہے

قتیل شفائی

میں ریت کے دریا پہ کھڑا سوچ رہا ہوں
اس شہر میں پانی تو یزیدوں نے پیا ہے

قیوم نظر

یاد آیا ہے کہ خوش باشی کو
غم کا افشردہ پیا کرتا تھا

ناصر کاظمی

ہمیں سے آنکھ چراتا ہے اس کا ہر ذرہ
مگر یہ خاک ہمارے ہی خوں کی پیاسی ہے