انشاء اللہ خان انشا

کاش ابر کرے چادرِ مہتاب کی چوری
تا مجھ سے بھی ہو جام مئے ناب کی چوری

حیدر علی آتش

فرقت یار میں کرتی ہے قیامت برپا
روزِ محشر سے نہیں کم شبِ مہتاب مجھے

مصحفی غلام ہمدانی

میری تربت کے تو آنگن میں نہ ٹھہرا اک دم
یہ ترے جی میں نہ آیا شبِ مہتاب ہے یاں

مصطفٰی خان شیفتہ

پلا جام ساقی مے ناب کا
کہ کچھ حظ اٹھے سیرِ مہتاب کا
وہاں تیرہ روزوں کی پروا کسے
جہاں شوق ہو سیرِ مہتاب کا

میر مہدی مجروح

نہیں ممکن کہ جمع ہوں دونوں
ساقی مہروش شبِ مہتاب

مرزا رفیع سودا

دل زلف و رخِ یار میں سوداؔ نہ پھرے کیوں
خوش آئے ہے اس کو شبِ مہتاب کی گردش

رئیس فروغؔ

صحرا کی زندگی میں ہمارے تو عیش ہیں
دن کو غزال رات کو مہتاب دیکھنا

اختر شیرانی

دو دن کے لیے ہم آئے ہیں اک شب کی جوانی لائے ہیں
فردوس سرائے ہستی میں ہم رنگِ گل مہتاب ہیں ہم

عبید اللہ علیم

ایسا ضدی تھا مرا عشق نہ بہلا پھر بھی
لوگ سچ مچ کئی مہتاب اٹھا کر لے آئے

ثروت حسین

تازہ و غم ناک رکھتے آس اور امید کی سب کونپلوں کو
اور پھر ہم راہیٔ باد شبانہ کے لیے مہتاب ہوتے

سیف الدین سیف

شگفت غنچۂ مہتاب کون دیکھے گا
میں سو گیا تو مرے خواب کون دیکھے گا

احمد فراز

سوئے فلک نہ جانبِ مہتاب دیکھنا
اس شہرِ دل نواز کے آداب دیکھنا
عاشقی میں میرؔ جیسے خواب مت دیکھا کرو
باؤلے ہو جاؤ گے مہتاب مت دیکھا کرو
دل بہلتا ہے کہاں انجم و مہتاب سے بھی
اب تو ہم لوگ گئے دیدۂ بے خواب سے بھی

قتیل شفائی

کیا خبر کب نیند آئے دیدۂ بے خواب میں
شام سے ہم جل رہے ہیں سایۂ مہتاب میں

محسن نقوی

بھرے شہر میں ایک ہی چہرہ تھا جسے آج بھی گلیاں ڈھونڈتی ہیں
کسی صبح اسی کی دھوپ کھلی کسی رات وہی مہتاب ہوا