انشاء اللہ خان انشا

ساتھ اپنے کوئی اسباب سفر لیتا ہے
تو فقیر اس گھڑی سر زانو پہ دھر لیتا ہے

شیخ ابراہیم ذوق

تیرہ بختی مری کرتی ہے پریشاں مجھ کو
تہمت اس زلفِ سیہ فام پہ دھر دیتی ہے
لائے جو مست ہیں تربت پہ گلابی آنکھیں
اور اگر کچھ نہیں دو پھول تو دھر جائیں گے

مصحفی غلام ہمدانی

یہ عجب زمانے کی رسم ہے کہ جنہوں پہ مرتے تھے ہم سدا
پسِ مرگ آ وہی خاک میں ہمیں آہ دھر کے چلے گئے
انداز غضب ہے یہ بتوں کا
ہاتھوں کو کمر پہ دھر کے چلنا

جون ایلیا

وہ ہماری طرف نہ دیکھ کے بھی
کوئی احسان دھر گیا ہو گا

خواجہ میر درد

تہمت چند اپنے ذمے دھر چلے
جس لیے آئے تھے سو ہم کر چلے

احسان دانش

ساحل کو بھی چھوڑتے نہیں لوگ
کشتی پہ بھی پاؤں دھر رہے ہیں

غلام محمد قاصر

تو نے دیکھا ہی نہیں ورنہ وفا کا مجرم
اپنی آنکھیں تری دہلیز پہ دھر آیا تھا

ماجد صدیقی

جو مجتمع ہو رہا ہوں پل پل مجھے بتا میں بکھر نہ جاؤں
یہ تحفۂ زیست تجھ کو لوٹا کے تجھ پہ احسان دھر نہ جاؤں

جلیل مانک پوری

ہائے دم بھر بھی دل ٹھہر نہ سکا
ہاتھ سینے پہ کوئی دھر نہ سکا

حفیظ جالندھری

ایسا ہو کوئی نامہ بر بات پہ کان دھر سکے
سن کے یقین کر سکے جا کے انہیں سنا سکے
مجھے ڈر ہے گلوں کے بوجھ سے مرقد نہ دب جائے
انہیں عادت ہے جب آنا ضرور احسان دھر جانا

حفیظ ہوشیارپوری

نگاہِ شوق کی محرومیوں سے ناواقف
نگاہِ شوق پہ الزام دھر گیا کوئی

شاد عظیم آبادی

وہ چاہے بد کہے قاصد بتوں کو یا مجھ کو
حرم میں چین سے ایمان جا کے دھر آیا

اختر ہوشیارپوری

ہاتھوں پہ میرے اپنے لہو کا نشان تھا
لوگوں نے اس کے قتل کا الزام دھر دیا

احمد فراز

زندگی تیری عطا ہے تو یہ جانے والا
تیری بخشش تری دہلیز پہ دھر جائے گا
سنا ہے اس کے لبوں سے گلاب جلتے ہیں
سو ہم بہار پہ الزام دھر کے دیکھتے ہیں

محسن احسان

کس اعتماد سے الزام دھر گئے اپنے
ہمارے نام کو بدنام کر گئے اپنے