مرزا غالب

کوہکن ’’نقاشِ یک تمثالِ شیریں‘‘ تھا اسدؔ
سنگ سے سر مار کر ہووے نہ پیدا آشنا
درخورِ قہر و غضب جب کوئی ہم سا نہ ہوا
پھر غلط کیا ہے کہ ہم سا کوئی پیدا نہ ہوا
گردِ راہ یار ہے سامان ناز زخمِ دل
ورنہ ہوتا ہے جہاں میں کس قدر پیدا نمک
جب تک دہانِ زخم نہ پیدا کرے کوئی
مشکل کہ تجھ سے راہِ سخن وا کرے کوئی
ہے وحشتِ طبیعتِ ایجاد یاس خیز
یہ درد وہ نہیں کہ نہ پیدا کرے کوئی
حسنِ فروغِ شمعِ سخن دور ہے اسدؔ
پہلے دلِ گداختہ پیدا کرے کوئی

مصحفی غلام ہمدانی

سوختگی نے غم کی اثر جو دل میں کیا ہے ہونے لگا ہے
تھوڑا تھوڑا رنگ دھوئیں کے سبزہ ہماری خاک سے پیدا
مفلس ہوئے اے مصحفیؔ افسوس کہ ہم نے
پیدا نہ کیا یار کو پیدا کے دنوں میں

یگانہ چنگیزی

اس کی نگاہِ شوق کے قربان جائیے
تجھ ایسے بے نشاں کو جو پیدا کرے کوئی

باقی صدیقی

کوئی نغمہ تو در سے پیدا ہو
آپ ہوں یا ہوا کا جھونکا ہو

جون ایلیا

نیا اک رشتہ پیدا کیوں کریں ہم
بچھڑنا ہے تو جھگڑا کیوں کریں ہم
ہے یہ قصہ کتنا اچھا پر میں اچھا سمجھوں تو
ایک تھا کوئی جس نے یک دم یہ دنیا پیدا کی تھی

ظہیر کاشمیری

ان کے روبرو نکلے نطق و لفظِ بے معنی
بات ہی عجب لیکن خامشی نے پیدا کی
وہ جلوہ جو سکوت بزم یکتائی میں رہتا ہے
وہ جلوہ شورش پنہاں و پیدا میں نہیں رہتا

جلیل مانک پوری

حسن و الفت میں خدا نے ربط پیدا کر دیا
دردِ دل مجھ کو دیا تم کو مسیحا کر دیا
دل تڑپتا ہے تو کچھ تسکین ہوتی ہے جلیلؔ
جی بہلنے کو خدا نے درد پیدا کر دیا

سیماب اکبر آبادی

پھر تصور نے بڑھا دی نالۂ موزوں کی لے
پھر سواد فکر سے اک شعر پیدا ہو گیا
آؤ پھر گرمی دیار عشق میں پیدا کریں
طور کی مٹی سے تخلیق یدِ بیضا کریں
جب تصور نے بڑھا دی نالۂ موزوں کی لے
ساز بے آواز سے اک شعر پیدا ہو گیا

شان الحق حقی

قلم کو ہے اسی صورت کدے کی جستجو یعنی
کہیں پنہاں تھی وہ صورت جو پیدا ہو گئی آخر

فانی بدایونی

دردمندان ازل پر عشق کا احساں نہیں
درد یاں دل سے گیا کب تھا کہ پیدا کر دیا

اختر ہوشیارپوری

لوگ لائے ہیں کہاں سے شب کو مرمر کے چراغ
ان چٹانوں میں تو دن کو راستہ پیدا نہ تھا

فراق گورکھپوری

جہاں تو جلوہ نما تھا لرزتی تھی دنیا
ترے جمال سے کیسا جلال پیدا تھا

قیوم نظر

لہلہاتی وادیوں سے خوب تر ہیں ریگ زار
دل کے صحرا میں گلستاں کی فضا پیدا کرو