انشاء اللہ خان انشا

اختلاط آپ سے اور مجھ سے کہاں کا ایسا
واہ جی جان نہ پہچان یہ گالی دینا

داغ دہلوی

بگڑے ہوئے مزاج کو پہچان جائیے
سیدھی طرح نہ مانئے گا مان جائیے
محفل میں کس نے آپ کو دل میں چھپا لیا
اتنوں میں کون چور ہے پہچان جائیے
گو نامہ بر سے خوش نہ ہوا پر ہزار شکر
مجھ کو وہ میرے نام سے پہچان تو گیا

عرفان صدیقی

بس ایک نام ہے اپنا نشاں، جو یاد نہیں
اور ایک چہرہ جو پہچان میں نہیں آتا
روئے دلبر بھی وہی، چہرۂ ِ قاتل بھی وہی
تو کبھی آنکھ ملائے تو میں پہچان سکوں

جمال احسانی

وہ اس جہان سے حیران جایا کرتے ہیں
جو اپنے آپ کو پہچان جایا کرتے ہیں

رئیس فروغؔ

کچھ تو تیرے حسن سے لوں
خوشبو کی پہچان سہی

بہزاد لکھنوی

اس وقت تک مکمل ہوتا نہیں ہے کوئی
جب تک کہ خود کو اپنی پہچان ہو نہ جائے

زہرا نگاہ

خوش جو آئے تھے پشیمان گئے
اے تغافل تجھے پہچان گئے

سیف الدین سیف

بدلا ہے مگر بھیس غمِ عشق کا تو نے
بس اے غمِ دوراں تجھے پہچان گئے ہم
کس سے پوچھوں کہ وہ بے مہر کہاں رہتا ہے
دل بے تاب مری جان نہ پہچان یہاں
راہ آسان ہو گئی ہو گی
جان پہچان ہو گئی ہو گی

سیماب اکبر آبادی

جو سالک ہے تو اپنے نفس کا عرفان پیدا کر
حقیقت تیری کیا ہے پہلے یہ پہچان پیدا کر

شاد عظیم آبادی

بھاگا تو بہت تھا موت سے میں کم بخت نے لیکن آن لیا
ان لاکھوں ہی مرنے والوں میں کیا جلد مجھے پہچان لیا
جس بھیس میں تو ہو کیا پروا آئندہ نہ کھائے گی دھوکا
اے طالب دنیا دنیا نے ہر طرح تجھے پہچان لیا
جو تنگ آ کر کسی دن دل پہ ہم کچھ ٹھان لیتے ہیں
ستم دیکھو کہ وہ بھی چھوٹتے پہچان لیتے ہیں

افضل منہاس

ہر بگولہ بستیوں کی سمت لہرانے لگا
آشنا چہرے بھی اب آتے نہیں پہچان میں

احمد فراز

کل تاریخ یقیناً خود کو دہرائے گی
آج کے اک اک منظر کو پہچان میں رکھنا

شاذ تمکنت

ہائے کیا آس تھی کیا کیا نہ تمہیں بننا تھا
تم بنے بھی تو مرے درد کی پہچان بنے

فراق گورکھپوری

بہت پہلے سے ان قدموں کی آہٹ جان لیتے ہیں
تجھے اے زندگی ہم دور سے پہچان لیتے ہیں
فراقؔ اکثر بدل کر بھیس ملتا ہے کوئی کافر
کبھی ہم جان لیتے ہیں کبھی پہچان لیتے ہیں

قتیل شفائی

تیرے در پر عمر کٹی ہے پھر بھی کیا ان جان رہا ہوں
دنیا بھر کے سجدوں میں اپنے سجدے پہچان رہا ہوں

ناصر کاظمی

قہر سے دیکھ نہ ہر آن مجھے
آنکھ رکھتا ہے تو پہچان مجھے