انشاء اللہ خان انشا

غش نسیمِ سحری ہے مجھ پر
میں نسیمِ سحری پر غش ہوں

بہادر شاہ ظفر

کہتا ترا کچھ سوختہ جاں لیک اجل نے
فرصت نہ اسے مثل چراغِ سحری دی

مصحفی غلام ہمدانی

مصحفیؔ ہے وقت وداع جہاں
مثل چراغِ سحری کیجیے
اس کے جانے سے مرا دل ہے مرے سینے میں
دم کا مہمان چراغِ سحری کی صورت

فیض احمد فیض

ہر سمت پریشاں تری آمد کے قرینے
دھوکے دیے کیا کیا ہمیں بادِ سحری نے

قمر جلالوی

ارماں ہو مجھے نزع میں کیا چارہ گری کا
گل کون تراشے ہے چراغِ سحری کا
اور اس کے سوا پھول کی تعریف ہی کیا ہے
احسان فراموش نسیمِ سحری کا

مصطفیٰ زیدی

راتوں کو کلی بن کے چٹکتا تھا ترا جسم
دھوکے میں چلی آئی نسیمِ سحری بھی
فرقت کے شب و روز میں کیا کچھ نہیں ہوتا
قدرت پہ ملامت بھی دعائے سحری بھی

ادا جعفری

کوئی سنگ رہ بھی چمک اٹھا تو ستارۂ سحری کہا
مری رات بھی ترے نام تھی اسے کس نے تیرہ شبی کہا

فراق گورکھپوری

وہ ڈھونڈنے نکلی ہے تری نکہت گیسو
اک روز ملا تھا میں نسیمِ سحری سے