انشاء اللہ خان انشا

جو گھڑی یاد میں تری کٹ جائے
وہ ہی آٹھوں پہر کی پونجی ہے

حیدر علی آتش

شیشے شراب کے رہیں آٹھوں پہر کھلے
ایسا گھرے کہ پھر نہ کبھی ابرِ تر کھلے

داغ دہلوی

پہلے تو سنا کرتے تھے عاشق کی مصیبت
اب آنکھ سے وہ آٹھ پہر دیکھ رہے ہیں

مصحفی غلام ہمدانی

قلق سے ہوتی ہے کچھ دل کی میرے یہ حالت
کہ نیند رات کو دو دو پہر نہیں آتی
گر ہم کو لگ گئی ہیں کبھی ہچکیاں تو ہم
آٹھ آٹھ آنسو روئے ہیں دو دو پہر تلک
صبح پر وصل کی ٹھہری ہے شبِ ہجر ترے
جاویں جلدی سے گزر چار پہر اور کہیں

باقی صدیقی

اس طرح شام کے سائے پھیلے
رات کا پچھلا پہر یاد آیا

قمر جلالوی

بیمار کو کیا خاک ہوا امیدِ سحر کی
وہ دو سانس کا دم اور یہ شب چار پہر کی
از شامِ ہجر تا بہ سحر کچھ نہ پوچھیے
کٹتے ہیں کیسے چار پہر کچھ نہ پوچھیے

احمد فراز

یہ دل کا درد تو عمروں کا روگ ہے پیارے
سو جائے بھی تو پہر دو پہر کو جاتا ہے
رات کے پچھلے پہر رونے کے عادی روئے
آپ آئے بھی مگر رونے کے عادی روئے

شاذ تمکنت

رات بھر جاگ کے کاٹے تو کوئی میری طرح
خود بہ خود سمجھے گا وہ پچھلا پہر کیا کچھ ہے