بہادر شاہ ظفر

اتنا نہ اپنے جامے سے باہر نکل کے چل
دنیا ہے چل چلاؤ کا رستہ سنبھل کے چل
پھر آنکھیں بھی تو دیں ہیں کہ رکھ دیکھ کر قدم
کہتا ہے کون تجھ کو نہ چل چل سنبھل کے چل

حیدر علی آتش

ایسی وحشت نہیں دل کو کہ سنبھل جاؤں گا
صورت پیرہنِ تنگ نکل جاؤں گا

شیخ ابراہیم ذوق

بیمارِ محبت نے لیا تیرے سنبھالا
لیکن وہ سنبھالے سے سنبھل جائے تو اچھا
دل گر کے نظر سے تری اٹھنے کا نہیں پھر
یہ گرنے سے پہلے ہی سنبھل جائے تو اچھا

مصطفٰی خان شیفتہ

سودا زدہ کہتے ہیں، ہوا شیفتہ افسوس
تھا دوست ہمارا بھی، سنبھل جائے تو اچھا

مومن خان مومن

کچھ جی گرا پڑے تھا پر اب تو نے ناز سے
مجھ کو گرا دیا تو مرا جی سنبھل گیا
پالغز محبت سے مشکل ہے سنبھل جانا
اس رخ کی صفائی پر اس دل کا پھسل جانا
دم لینے کی طاقت ہے بیمارِ محبت ہے
اتنا بھی غنیمت ہے مومنؔ کا سنبھل جانا

فیض احمد فیض

شامِ فراق، اب نہ پوچھ، آئی اور آ کے ٹل گئی
دل تھا کہ پھر بہل گیا، جاں تھی کہ پھر سنبھل گئی
بات بس سے نکل چلی ہے
دل کی حالت سنبھل چلی ہے

باقی صدیقی

ہے جھوٹ کہ سچ کسے خبر ہے
سنتے ہیں کہ ہم سنبھل رہے ہیں

جون ایلیا

شاخ امید جل گئی ہو گی
دل کی حالت سنبھل گئی ہو گی

قمر جلالوی

کچھ وہ کہہ دیتے ہیں بیمار سنبھل جاتا ہے
وقت کا ٹالنے والا ہو تو ٹل جاتا ہے
اب بھی سنبھلا نہیں او ٹھوکریں کھانے والے
ٹھوکریں کھا کہ تو انسان سنبھل جاتا ہے

رئیس فروغؔ

اک پیڑ ہوا کے ساتھ چلا
پھر گرتے گرتے سنبھل گیا

ادا جعفری

ہر گام سنبھل سنبھل رہی تھی
یادوں کے بھنور میں چل رہی تھی
لوگوں کو پسند لغزشِ پا
ایسے میں اداؔ سنبھل رہی تھی

بیان میرٹھی

ہر طرح ہاتھ میں ہوں گوشۂ دامن کی طرح
وہ سنبھالیں گے جو مجھ کو تو سنبھل جاؤں گا
مثل حباب بحر نہ اتنا اچھل کے چل
ہیں ساتھ ساتھ موج حوادث سنبھل کے چل

زہرا نگاہ

اس جھوٹ کی دلدل سے باہر بھی نکل آتے
دنیا میں بھی سر اٹھتا اور گھر بھی سنبھل جاتا

عبید اللہ علیم

عزیز اتنا ہی رکھو کہ جی سنبھل جائے
اب اس قدر بھی نہ چاہو کہ دم نکل جائے

سلام مچھلی شہری

بس اک لطیف تبسم بس اک حسین نظر
مریض دل کی یہ حالت سنبھل تو سکتی ہے

شکیل بدایونی

تری گفتگو کو ناصح دل غم زدہ سے جل کر
ابھی تک تو سن رہا تھا مگر اب سنبھل سنبھل کر

احمد فراز

ہر ایک عشق کے بعد اور اس کے عشق کے بعد
فراز اتنا بھی آساں نہ تھا سنبھل جانا

فراق گورکھپوری

کچھ اور مصلحت‌ جذبِ عشق ہے ورنہ
کسی سے چھٹ کے طبیعت سنبھل تو سکتی ہے
تری نگاہ سہارا نہ دے تو بات ہے اور
کہ گرتے گرتے بھی دنیا سنبھل تو سکتی ہے