مرزا غالب

بر روئے شش جہت در آئینہ باز ہے
یاں امتیازِ ناقص و کامل نہیں رہا

امام بخش ناسخ

سامنے میرے رہا گر شام سے لے تا سحر
حسن میں گر مثل ماہ چاردہ کامل ہوا

بہادر شاہ ظفر

ہے ہلال و بدر میں اک نور پر جو روشنی
دل میں ناقص کے ہے وہ کامل کے دل میں اور ہے
عکس رخسار نے کس کے ہے تجھے چمکایا
تاب تجھ میں مہِ کامل کبھی ایسی تو نہ تھی

داغ دہلوی

بظاہر با ادب یوں حضرتِ ناصح سے ملتا ہوں
مرید خاص جیسے مرشد کامل سے ملتا ہے
غضب ہے داغؔ کے دل سے تمہارا دل نہیں ملتا
تمہارا چاند سا چہرہ مہِ کامل سے ملتا ہے

مصطفٰی خان شیفتہ

ہے خراشِ ناخنِ غم میں بھی کیا بالیدگی
جو ہلالِ غرہ تھا، سو ماہِ کامل ہو گیا

مومن خان مومن

دیکھے ہے چاندنی وہ زمیں پر نہ گر پڑے
اے چرخ اپنے تو مہِ کامل کو تھامنا

جگر مراد آبادی

اب کدھر جاؤں بتا اے جذبۂ کامل مجھے
ہر طرف سے آج آتی ہے صدائے دل مجھے
حقیقت میں جو راز دوریِ منزل سمجھتے ہیں
انہیں کو ہم سلوک عشق میں کامل سمجھتے ہیں

قمر جلالوی

قمر کے نام سے شرمانے والے سیر تاروں کی
نکل آیا جو ایسے میں مہِ کامل تو کیا ہو گا
قمر اختر شماری کے لیے تیار ہو جاؤ
کہ اب رسمِ محبت اس مہِ کامل سے ٹوٹے گی

عرفان صدیقی

ابھی پیکر ہی جلا ہے تویہ عالم ہے میاں
آگ یہ روح میں لگ جائے تو کامل ہو جاؤ

احسان دانش

مجھے پوچھا ہے آ کر تم نے اس اخلاق کامل سے
کہ میں شرمندہ ہو کر رہ گیا اندازۂ دل سے
جستجو رہرو‌ الفت کی جو کامل ہو جائے
شوقِ منزل ہی چراغِ رہِ منزل ہو جائے

اسرار الحق مجاز

نہیں یہ فکر کوئی رہبر کامل نہیں ملتا
کوئی دنیا میں مانوس مزاج دل نہیں ملتا
غرورِ حسن باطل پر نظر ہے
نیازِ عشق کامل دیکھتا ہوں

علی سردار جعفری

فصلِ گل فصلِ خزاں جو بھی ہو خوش دل رہیے
کوئی موسم ہو ہر اک رنگ میں کامل رہیے
داغ سینے کا دہکتا رہے جلتا رہے دل
رات باقی ہے جہاں تک مہِ کامل رہیے