بہادر شاہ ظفر

عریانی تن ہے یہ بہ از خلعت شاہی
ہم کو یہ ترے عشق میں سامان ہے موجود

داغ دہلوی

کسی نے ملنے کا کیا وعدہ کہ داغ
آج ہو تم اور ہی سامان میں
وعدے کی شب رہا ہے کیا انتظار مجھ کو
آنے کا وہ یہاں تک سامان کر کے بھولے
دل پریشان ہوا جاتا ہے
اور سامان ہوا جاتا ہے
ہوش و حواس و تاب و تواں داغؔ جا چکے
اب ہم بھی جانے والے ہیں سامان تو گیا

عرفان صدیقی

زرتاب ترا قریۂ ویران کر دیا
میرے لہو نے سب سر و سامان کر دیا
وحشت کے ساتھ دشت مری جان چاہیے
اس عیش کے لیے سر و سامان چاہیے
رونقِ شہر سے مایوس نہ ہو بانوئے شہر
خاک اڑانے کو ترے بے سرو سامان جو ہیں

جمال احسانی

اس سرائے میں نہ پھیلائیے اجزائے حیات
جانے کس وقت یہ سامان اٹھانا پڑ جائے

اختر شیرانی

اخترؔ کو زندگی کا بھروسا نہیں رہا
جب سے لٹا چکے سر و سامان آرزو!

عالم تاب تشنہ

کس کس سے دوستی ہوئی یہ دھیان میں نہیں
ان میں سے ایک بھی مرے سامان میں نہیں

تلوک چند محروم

حسن ہے جانِ غزل اور عشق ایمان غزل
کائنات شعر میں ہے خوب سامان غزل

حسرت موہانی

تنہائی میں بھی تیرے تصور کی بدولت
دل بستگی غم کے ہیں سامان ہزاروں

سیف الدین سیف

اب یہی لوگ کریں گے نئی دنیا تعمیر
تو نے دیکھا ہے جنہیں بے سر و سامان یہاں
ہمیں خبر ہے وہ مہمان ایک رات کا ہے
ہمارے پاس بھی سامان ایک رات کا ہے

شاد عظیم آبادی

اقسام تھے یاس و حسرت کے اصناف امید بے حد کے
جب چلنے لگے ہم دنیا سے ساتھ اپنے بہت سامان لیا
بہ قدر حوصلہ صحرائے وحشت چھان لیتے ہیں
مسافر ہیں سفر کے واسطے سامان لیتے ہیں
مصیبت جس سے زائل ہو رہی سامان کر دے گا
نہ گھبرانا خدا سب مشکلیں آسان کر دے گا
تمناؤں کی مہمانی تصور کے حوالے کر
کہ جو ساماں مناسب ہے وہی سامان کر دے گا

شکیل بدایونی

دل ہے آمادۂ تکمیل نشاط
غم کا سامان ہوا جاتا ہے

فانی بدایونی

اک جان ہے وہ خیر سے وارفتۂ غم ہے
اک دل ہے سو ہے سوختہ سامان تمنا
اے سوزِ غم جلا دے اے درد خوں رلا دے
کچھ ان کی دل لگی کا سامان رہ نہ جائے

افضل منہاس

لوگ میری موت کے خواہاں ہیں افضلؔ کس لیے
چند غزلوں کے سواِ کچھ بھی نہیں سامان میں

شاذ تمکنت

اہلِ ساحل سے ندامت سی ندامت ہے کہ ہم
ایک کشتی تہہ آب کا سامان بنے

قتیل شفائی

آؤ کوئی تفریح کا سامان کیا جائے
پھر سے کسی واعظ کو پریشان کیا جائے

میرا جی

غم کے بھروسے کیا کچھ چھوڑا کیا اب تم سے بیان کریں
غم بھی راس نہ آیا دل کو اور ہی کچھ سامان کریں