بہادر شاہ ظفر

تم چشم حقیقت سے اگر آپ کو دیکھو
آئینۂِ حق میں دل انسان ہے موجود

داغ دہلوی

گر فرشتہ وش ہوا کوئی تو کیا
آدمیت چاہیے انسان میں
گر ہو سلوک کرنا انسان کر کے بھولے
احسان کا مزا ہے احسان کر کے بھولے
اپنے کیے پہ نازاں ہو آدمی نہ ہر گز
طاعت ہو یا اطاعت انسان کر کے بھولے
تم سے وفا جو کی ہے ہم سے خطا ہوئی ہے
ایسا قصور کیوں کر انسان کر کے بھولے
خدمت پیرِ مغاں کر زاہد
تو اب انسان ہوا جاتا ہے

شیخ ابراہیم ذوق

ہے موج بحر عشق وہ طوفاں کہ الحفیظ
بیچارہ مشتِ خاک تھا انسان بہہ گیا

عرفان صدیقی

کچھ نہ کچھ بھول تو ہو جاتی ہے انسان جو ہیں
یاد وہ بھی نہیں آتا ہے پریشان جو ہیں

بہزاد لکھنوی

ہوتی نہیں ہے وقعت ہوتی نہیں ہے عزت
جب تک کہ کوئی انساں انسان ہو نہ جائے

جلیل مانک پوری

جواں ہوتے ہی لے اڑا حسن تم کو
پری ہو گئے تم تو انسان ہو کر

سلام مچھلی شہری

بے شک حضور آپ خدا کی طرح رہیں
جینے کا حق ہمیں بھی ہے انسان کی طرح

سیماب اکبر آبادی

الٰہی بھید تیرے اس نے ظاہر کر دیے سب پر
کہا تھا کس نے تو سیمابؔ کو انسان پیدا کر

شکیل بدایونی

بے پیے شیخ فرشتہ تھا مگر
پی کے انسان ہوا جاتا ہے

افضل منہاس

وقت پڑتے ہی ہوئے روپوش سب حلقہ بگوش
اک یہی خوبی تو ہے اس دور کے انسان میں

احمد فراز

میں تجھے کھو کے بھی زندہ ہوں یہ دیکھا تو نے
کس قدر حوصلہ ہارے ہوئے انسان میں ہے

فراق گورکھپوری

جسے کہتی ہے دنیا کامیابی وائے نادانی
اسے کن قیمتوں پر کام یاب انسان لیتے ہیں
اب اس کو کفر مانیں یا بلندی نظر جانیں
خدائے دو جہاں کو دے کے ہم انسان لیتے ہیں

قتیل شفائی

دور سنہرے گنبد چمکے لیکن گردن کون جھکائے
میں تو جنت بھی کھو کر آزاد منش انسان رہا ہوں

محسن احسان

مدتیں گزریں تو اک قطرہ گہر بن پایا
صدیاں بیتیں تو کہیں آدمی انسان ہوا

محسن نقوی

میرے حال پہ حیرت کیسی درد کے تنہا موسم میں
پتھر بھی رو پڑتے ہیں انسان تو پھر انسان ہوا