بہادر شاہ ظفر

جن کو یکتائی کا دعویٰ تھا وہ مثلِ آئینہ
ان کو حیرت ہے کہ پیدا دوسرا کیونکر ہوا

داغ دہلوی

پھر نہ رکئے جو مدعا کہیے
ایک کے بعد دوسرا کہیے
آپ کا خیر خواہ میرے سوا
ہے کوئی اور دوسرا کہیے

مومن خان مومن

تم مرے پاس ہوتے ہو گویا
جب کوئی دوسرا نہیں ہوتا

جگر مراد آبادی

اس سے بڑھ کر دوست کوئی دوسرا ہوتا نہیں
سب جدا ہو جائیں لیکن غم جدا ہوتا نہیں

شکیب جلالی

کنارِ آب کھڑا خود سے کہہ رہا ہے کوئی
گماں گزرتا ہے ‘ یہ شخص دوسرا ہے کوئی
مکان اور نہیں ہے ‘ بدل گیا ہے مکیں
افق وہی ہے مگر چاند دوسرا ہے کوئی

عرفان صدیقی

مجھے وہ لفظ جو لکھے تو کوئی اور لگے
سخن کرے کبھی مجھ سے تو دوسرا ہو جائے
غرض نہیں کہ کوئی اور کیا سمجھتا رہا
بس ایک لکھتا رہا دوسرا سمجھتا رہا
خیر‘ اگر تم سے نہ جل پائیں وفاؤں کے چراغ
تم بجھانا مت جو کوئی دوسرا روشن کرے
خدا کرے صفِ سر دادگاں نہ ہو خالی
جو میں گروں تو کوئی دوسرا نکل آئے

رئیس فروغؔ

میں دوسروں کے جہنم سے بھاگتا ہوں فروغؔ
فروغؔ اپنے لیے دوسرا تو میں بھی ہوں

ادا جعفری

یہ حکم ہے تری راہوں میں دوسرا نہ ملے
شمیم جاں تجھے پیراہن صبا نہ ملے

بہزاد لکھنوی

نگاہِ شوق میں بے نوریوں کا رنگ بڑھا
نگاہ شوق کو جب کوئی دوسرا نہ ملا
تری نگاہ محبت نواز ہی کی قسم
کہ آج تک تو ہمیں تجھ سا دوسرا نہ ملا

بشیر بدر

کتنی سچائی سے مجھ سے زندگی نے کہہ دیا
تو نہیں میرا تو کوئی دوسرا ہو جائے گا
یہ زعفرانی پلوور اسی کا حصہ ہے
کوئی جو دوسرا پہنے تو دوسرا ہی لگے

غلام محمد قاصر

رات اس کے سامنے میرے سوا بھی میں ہی تھا
سب سے پہلے میں گیا تھا دوسرا بھی میں ہی تھا

ثروت حسین

پتھروں میں آئنا موجود ہے
یعنی مجھ میں دوسرا موجود ہے

حسرت موہانی

کیا کہتے ہو کہ اور لگا لو کسی سے دل
تم سا نظر بھی آئے کوئی دوسرا مجھے
یوں تو عاشق ترا زمانہ ہوا
مجھ سا جاں باز دوسرا نہ ہوا

رسا چغتائی

مری آنکھوں پہ عینک دوسری ہے
کہ یہ تصویر کا رخ دوسرا ہے

شکیل بدایونی

تو بچائے لاکھ دامن مرا پھر بھی ہے یہ دعویٰ
ترے دل میں میں ہی میں ہوں کوئی دوسرا نہیں ہے
مری آنکھ نے تجھے بھی بہ خدا شکیلؔ پایا
میں سمجھ رہا تھا مجھ سا کوئی دوسرا نہیں ہے

عزیز حامد مدنی

اس گفتگو سے یوں تو کوئی مدعا نہیں
دل کے سوا حریف کوئی دوسرا نہیں

فانی بدایونی

بہت تنگ ہے وہم ہستی کی دنیا
میں عالم ہی اب دوسرا چاہتا ہوں

اکبر حمیدی

پہلا تو اب کسی جگہ بھی نہیں
جس طرف دیکھو دوسرا ہے یہاں