حیدر علی آتش

حالت آئینہ رکھتا ہے صفا سے دل مرا
آشنا سے آشنا بیگانہ سے بیگانہ ہے
باغ عالم میں نہیں اس شوخ سا کوئی حسیں
گل ہے اپنا یار یوسف سبزۂ بیگانہ ہے
خدا کا گھر ہے بت خانہ ہمارا دل نہیں آتشؔ
مقام آشنا ہے یاں نہیں بیگانہ آتا ہے
یہ حال ہوا اس کے فقیروں سے ہویدا
آلودۂ دنیا جو ہے بیگانہ ہے اس کا

داغ دہلوی

یہ آمد ہے کہ آفت ہے نگہ کچھ ہے ادا کچھ ہے
الٰہی خیر مجھ سے آشنا بیگانہ آتا ہے

یگانہ چنگیزی

چشم ہوس ہے شیفتۂ حسن ظاہری
دل آشنائے معنی بیگانہ ہو گیا
کیا جانے آج خواب میں کیا دیکھا یاسؔ نے
کیوں چونکتے ہی آپ سے بیگانہ ہو گیا

خواجہ میر درد

حیف! کہتے ہیں ہوا گل زار تاراج خزاں
آشنا اپنا بھی واں اک سبزۂ بیگانہ تھا

احسان دانش

جب وہ کرتے ہیں محبت پر مسلسل گفتگو
ایسا کچھ محسوس ہوتا ہے کہ ہیں بیگانہ ہم

اختر شیرانی

شہرِ جاناں میں اترنے کی تھی ہم پر قدغن
یوں چلے جیسے کوئی شہر سے بیگانہ چلے

بہزاد لکھنوی

ہے خرد مندی یہی باہوش دیوانہ رہے
ہے وہی اپنا کہ جو اپنے سے بیگانہ رہے
فیض راہِ عشق ہے یا فیض جذبِ عشق ہے
ہم تو منزل پا کے بھی منزل سے بیگانہ رہے

سیماب اکبر آبادی

ضبط سے نا آشنا ہم صبر سے بیگانہ ہم
کیوں کسی سے مانگتے جائیں چراغ خانہ ہم
بسکہ ہے سیمابؔ بے مہری یگانوں کا شعار
ہیں رہین التفات خاطر بیگانہ ہم

شان الحق حقی

حیرت کیا ہے ہم سے بڑھ کر کون بھلا بیگانہ ہو گا
خود اپنے کو بھول چکے ہیں تم نے کیا پہچانا ہو گا

شکیل بدایونی

دنیا کی روایات سے بیگانہ نہیں ہوں
چھیڑو نہ مجھے میں کوئی دیوانہ نہیں ہوں
میں قائل خودداری الفت سہی لیکن
آداب محبت سے تو بیگانہ نہیں ہوں
کانٹوں سے گزر جاتا ہوں دامن کو بچا کر
پھولوں کی سیاست سے میں بیگانہ نہیں ہوں
اک اک زبان پر مری روداد ہے شکیلؔ
اپنوں کے ساتھ کیا کوئی بیگانہ مل گیا

عزیز حامد مدنی

کس قدر حیرت اثر نکلی ہے مرگ عندلیب
اس سپاس جاں سے گل لگتا ہے بیگانہ مجھے

امیر مینائی

ہم تھے اور پیشِ نظر جلوۂ مستانۂ عشق
جس زمانے میں نہ محرم تھا نہ بیگانہ عشق

فراق گورکھپوری

بے نیازی کو تری پایا سراسر سوز و درد
تجھ کو اک دنیا سے بیگانہ سمجھ بیٹھے تھے ہم

کلیم عاجز

آشنا غم سے ملا راحت سے بیگانہ ملا
دل بھی ہم کو خوبی قسمت سے دیوانہ ملا

ناصر کاظمی

ہم ہی گلشن کے امیں ہیں ناصر
ہم سا کوئی نہیں بیگانۂ گل
کوئی صورت آشنا اپنا نہ بیگانہ کوئی
کچھ کہو یارو یہ بستی ہے کہ ویرانہ کوئی