حیدر علی آتش

دو جہاں حشر کے دن ہوویں گے باہم موجود
متفق ہوں گے ادھر والے ادھر والوں سے

بشیر بدر

سو خلوص باتوں میں سب کرم خیالوں میں
بس ذرا وفا کم ہے تیرے شہر والوں میں

سدرشن فاکر

لوگ اپنے لیے اوروں میں وفا ڈھونڈتے ہیں
ان وفا ڈھونڈنے والوں پہ ہنسی آتی ہے
دیکھنے والو تبسم کو کرم مت سمجھو
انہیں تو دیکھنے والوں پہ ہنسی آتی ہے

فارغ بخاری

دیکھ یوں وقت کی دہلیز سے ٹکرا کے نہ گر
راستے بند نہیں سوچنے والوں کے لیے
شبِ فرقت میں سلگتی ہوئی یادوں کے سوا
اور کیا رکھا ہے ہم چاہنے والوں کے لیے

جلیل مانک پوری

امید و یاس نے جھگڑے میں ڈال رکھا ہے
نہ جینے والوں میں ہم ہیں نہ مرنے والوں میں
نسیم شمع لحد کو ذرا بچائے ہوئے
یہی ہے ایک غریبوں کے رونے والوں میں
نہیں ہے لطف کہ خلوت میں غیر شامل ہو
اٹھا دو شمع کو یہ بھی ہے جلنے والوں میں

سیف الدین سیف

ہم رہین غمِ حیات رہے
موت آئی نصیب والوں کو

کلیم عاجز

دھڑکتا جاتا ہے دل مسکرانے والوں کا
اٹھا نہیں ہے ابھی اعتبار نالوں کا
نہ آئیں اہلِ خرد وادی جنوں کی طرف
یہاں گزر نہیں دامن بچانے والوں کا
لپٹ لپٹ کے گلے مل رہے تھے خنجر سے
بڑے غضب کا کلیجا تھا مرنے والوں کا