حیدر علی آتش

پیمانہ میری عمر کا لبریز ہو کہیں
ساقی مجھے بھی اب تو پیالہ پلا چکے

داغ دہلوی

عمر جاوید خضر کو بخشی
آب حیواں پلا دیا تو نے

باقی صدیقی

دل پر کھلا نہ تھا کبھی یہ تشنگی کا روپ
وہ میرا زہر مجھ کو پلا کر چلا گیا

جون ایلیا

چشم میگوں سے ہے مغاں نے کہا
مست کر دے مگر پلا ہی نہیں

عبدالحمید عدم

بہت سے لوگوں کو غم نے جلا کے مار دیا
جو بچ رہے تھے انہیں مے پلا کے مار دیا
نہ آپ آس بندھاتے نہ یہ ستم ہوتا
ہمیں تو آپ نے امرت پلا کے مار دیا
رک رک کے ساز چھیڑ کہ دل مطمئن نہیں
تھم تھم کے مے پلا کہ طبیعت اداس ہے
اتنا تو دوستی کا صلہ دیجیے مجھے
اپنا سمجھ کے زہر پلا دیجیے مجھے

قمر جلالوی

اس کرم کو مری مایوس نظر سے پوچھو
ساقی بیٹھا رہا اور اٹھ کے پلا دی تو نے

رئیس فروغؔ

نیم کی چھاؤں میں بیٹھنے والے سبھی کے سیوک ہوتے ہیں
کوئی ناگ بھی آ نکلے تو اس کو دودھ پلا دینا

اختر شیرانی

تشنۂ حسن ہوں اے ساقی مے خانۂ حسن
اپنے ہونٹوں سے پھر اک جام پلا دے آ کر

جلیل مانک پوری

میں ڈر رہا ہوں تمہاری نشیلی آنکھوں سے
کہ لوٹ لیں نہ کسی روز کچھ پلا کے مجھے

شاد عظیم آبادی

میں وہ نہیں کہ خود اپنے قدح کی خیر مناؤں
پیوں تو بزم میں دس پانچ کو پلا کے پیوں

قتیل شفائی

گم ہو گیا مستی میں تڑپنے کا مزہ بھی
کیا چیز قتیلؔ آج پلا دی گئی مجھ کو

کیف بھوپالی

جھوم کے جب رندوں نے پلا دی
شیخ نے چپکے چپکے دعا دی

ناصر کاظمی

رہ گئے دستِ صبا کملا کر
پھول کو آگ پلا دی ہم نے