حیدر علی آتش

یاد آ گئی جو سلکِ گہر تیرے گوش کی
سوہان روح تھی مجھے شب کہکشاں نہ تھی

شیخ ابراہیم ذوق

عزا داری میں ہے کس کی یہ چرخ ماتمی جامہ
کہ حبیب چاک کی صورت ہے خط کہکشاں ہوتا

مصطفٰی خان شیفتہ

صبح شبِ وصال نیِ صبح ہے ، مگر
پرویں ہنوز جلوہ گر و کہکشاں ہنوز

باقی صدیقی

جاتی نہیں تیرگی دلوں کی
رستے تو مثلِ کہکشاں ہیں
ترے شگفتہ شگفتہ نقوشِ پا کے طفیل
مری نظر میں ہر اک راہ کہکشاں تھی کبھی
ترے شگفتہ شگفتہ نقوشِ پا کے طفیل
مری نگاہ میں ہر راہ کہکشاں تھی کبھی

مجید امجد

دور سے دیکھو، اونچا پل اس شہر کا
پانیوں پر اک لوہے کی یہ کہکشاں

مصطفی زیدی

انہیں پتھروں پہ چل کر اگر آ سکو تو آؤ
مرے گھر کے راستے میں کوئی کہکشاں نہیں ہے

اسرار الحق مجاز

ہمدم یہی ہے رہ گزر یار خوش خرام
گزرے ہیں لاکھ بار اسی کہکشاں سے ہم

ماجد صدیقی

گل ہیں خوشبو ہیں کہکشاں ہیں ہم
تو ہے عنوان دل، بیاں ہیں ہم

خاطر غزنوی

بلا رہی ہیں جو تیری ستارہ بار آنکھیں
مری نگاہ نہ کیوں کہکشاں سے لوٹ آئے

سلام مچھلی شہری

اب کچھ نہیں ہے معبد گیتی خطا معاف
موتی سے اشک صرف مہ و کہکشاں ہوئے

اختر ہوشیارپوری

عجیب نور سے رشتہ تھا نور کا اختر
کئی چراغ جلے کہکشاں کے ہوتے ہوئے
بہت تاریک تھیں ہستی کی راہیں
بدن کو کہکشاں کرنا پڑا ہے

محسن نقوی

حسرتوں سے اٹے آسماں کے تلے
جلتی بجھتی ہوئی کہکشاں ایک میں