داغ دہلوی

سمائیں اپنی نگاہوں میں ایسے ویسے کیا
رقیب ہی سہی ہو آدمی ٹھکانے کا

میر مہدی مجروح

نیچی نظروں کے وار آنے لگے
لو بس اب جان و دل ٹھکانے لگے

فیض احمد فیض

چلو فیض پھر سے کہیں دل لگائیں
سنا ہے ٹھکانے کے دن آ رہے ہیں

باقی صدیقی

تیرے در تک نہیں جانے پاتے
ہم کہاں اور ٹھکانے پاتے

عبدالحمید عدم

ضمیر صدف میں کرن کا مقام
انوکھے انوکھے ٹھکانے ترے

قمر جلالوی

مبتلا ہوئے ایسے آسماں کی گردش میں
اے قمر نہ بیٹھے ہم آج تک ٹھکانے سے
نالے نہیں کھیل اسیرانِ قفس کے
صیاد کے آ جائیں گے سب ہوش ٹھکانے

بشیر بدر

کیوں حویلی کے اجڑنے کا مجھے افسوس ہو
سیکڑوں بے گھر پرندوں کے ٹھکانے ہو گئے

غلام محمد قاصر

ہم تو وہاں پہنچ نہیں سکتے تمام عمر
آنکھوں نے اتنی دور ٹھکانے بنائے ہیں

سیف الدین سیف

فضائے کنجِ چمن میں ہمیں تلاش نہ کر
مسافروں کے ٹھکانے بدلتے رہتے ہیں

احمد فراز

تو بھی خوشبو ہے مگر میرا تجسس بے کار
برگِ آوارہ کی مانند ٹھکانے میرے
اب تو رونے سے بھی دل دکھتا ہے
شاید اب ہوش ٹھکانے آئے
نہیں ایسا بھی کہ اک عمر کی قربت کے نشے
ایک دو روز کی رنجش سے ٹھکانے لگ جائیں

شاذ تمکنت

شاذؔ جی عشق میں ایسا ہی ہوا کرتا ہے
تم ہوئے قیس ہوئے دونوں ٹھکانے سے گئے

فراق گورکھپوری

فراقؔ اپنی قسمت میں شاید نہیں تھے
ٹھکانے کے دن یا ٹھکانے کی راتیں
بے ٹھکانے ہے دل غمگیں ٹھکانے کی کہو
شامِ ہجراں دوستو کچھ اس کے آنے کی کہو

کیف بھوپالی

آج کل پھر دلِ برباد کی باتیں ہیں وہی
ہم تو سمجھے تھے کہ کچھ عقل ٹھکانے آئی

محبوب خزاں

حال احوال کیا بتائیں کسے
سب ارادے گئے ٹھکانے لگے