داغ دہلوی

جو آدمی پہ گزری وہ اک سوا تمہارے
کیا جی لگا کے سنتے افسانے آدمی ہیں

مصحفی غلام ہمدانی

مجھے اے مصحفیؔ ہے کام ہر دمِ ذکر خوباں سے
اسی خاطر تو میں مشغول افسانے میں رہتا ہوں

یگانہ چنگیزی

سلسلہ چھڑ گیا جب یاسؔ کے افسانے کا
شمع گل ہو گئی دل بجھ گیا پروانے کا
بزم میں صبح ہوئی چھا گیا اک سناٹا
سلسلہ چھڑ گیا جب آپ کے افسانے کا
دردِ دل روئیں کس امید پہ بیگانے سے
صبح ہونے کی نہیں یاس اس افسانے سے
کوئی اتنا بھی نہیں آپ سے غیبت ہی کرے
کانٹے پڑتے ہیں زباں میں مرے افسانے سے
پہلے سرگوشیاں تھیں چھا گیا اب سناٹا
بزم میں صبح ہوئی یاسؔ کے افسانے سے
مسند آتش مغفور مبارک ہو یاسؔ
آئے سناٹے میں غالبؔ ترے افسانے سے

باقی صدیقی

ہر ایک بات زباں پر نہ آ سکی باقیؔ
کہیں کہیں سے سنائے ہیں ہم نے افسانے

عبدالحمید عدم

اب مجھے دار و رسن کی سمت مڑنے دیجیے
آپ نے خود تو چنا تھا میرے افسانے کا نام

قمر جلالوی

صبح ہوئی نہیں اے عشق یہ کیسی شب ہے
قیس و فرہاد کے دہرا لیے افسانے تک
میں وہاں کیسے حقیقت کو سلامت رکھوں
جس جگہ رد و بدل ہو گئے افسانے تک
سنائے کوئی کہاں تک جنوں کے افسانے
نہ جانے ہو گئے آباد کتنے ویرانے
زمینِ عشق میں ہیں دفن وہ بھی دیوانے
نہ جن کے نام کی شہرت نہ جن کے افسانے
جہاں سے عشق نے رودادِ غم کو چھوڑ دیا
شروع میں نے وہاں سے کیے ہیں افسانے
وہ چار چاند فلک کو لگا چلا ہوں قمر
کہ میرے بعد ستارے کہیں گے افسانے

مجید امجد

تری پلکوں کی جنبش سے جو ٹپکا
اسی اک پل کے افسانے زمانے

احسان دانش

پاسباں مفہوم و معنی کو بیاں کرتے رہیں
سننے والے سن چکے ہیں کہہ چکے افسانے ہم

زہرا نگاہ

فنا کے زمزمے رنج و محن کے افسانے
یہی ملے ہیں نئی زندگی کو نذرانے
تری نگاہ کی جنبش میں اب بھی شامل ہیں
مری حیات کے کچھ مختصر سے افسانے

عبید اللہ علیم

کل ماتم بے قیمت ہو گا آج ان کی توقیر کرو
دیکھو خونِ جگر سے کیا کیا لکھتے ہیں افسانے لوگ

فارغ بخاری

بدلتے دیر نہیں لگتی اب حقیقت کو
جو کل کی باتیں ہیں وہ آج کے ہیں افسانے

احمد راہی

قد و گیسو لب و رخسار کے افسانے چلے
آج محفل میں ترے نام پہ پیمانے چلے

جلیل مانک پوری

میں کروں کس کا نظارہ دیکھ کر تیرا جمال
میں سنوں کس کا فسانہ تیرے افسانے کے بعد

جوش ملیح آبادی

جو غنچہ و شبنم تھے کل رات کے ہونٹوں پر
اب صبح کے کانوں پر نشتر ہیں وہ افسانے

خاطر غزنوی

میں اسے شہرت کہوں یا اپنی رسوائی کہوں
مجھ سے پہلے اس گلی میں میرے افسانے گئے

شاد عظیم آبادی

کچھ کہے جاتا تھا غرق اپنے ہی افسانے میں تھا
مرتے مرتے ہوش باقی تیرے دیوانے میں تھا
ہنستے ہنستے رو دیا کرتے تھے سب بے اختیار
اک نئی ترکیب کا درد اپنے افسانے میں تھا
سن چکے جب حال میرا لے کے انگڑائی کہا
کس غضب کا درد ظالم تیرے افسانے میں تھا

شکیل بدایونی

شاید آغاز ہوا پھر کسی افسانے کا
حکم آدم کو ہے جنت سے نکل جانے کا
ان سے کچھ کہہ تو رہا ہوں مگر اللہ کرے
وہ بھی مفہوم نہ سمجھیں مرے افسانے کا
حشر تک گرمی ہنگامۂ ہستی ہے شکیلؔ
سلسلہ ختم نہ ہو گا مرے افسانے کا

فانی بدایونی

مختصر قصۂ غم یہ ہے کہ دل رکھتا ہوں
راز کونین خلاصہ ہے اس افسانے کا
لوحِ دل کو غمِ الفت کو قلم کہتے ہیں
کن ہے انداز رقم حسن کے افسانے کا

فراق گورکھپوری

اس گم کردۂ دیدہ و دل کو کل تک کتنے جانتے تھے
اب تو فراقؔ بے خود کے عالم عالم افسانے ہیں

قابل اجمیری

ہمیں روداد ہستی رات بھر میں ختم کرنی ہے
نہ چھیڑو اور افسانے ستارو تم تو سو جاؤ

قتیل شفائی

اے دیدۂ گریاں کیا کہیے اس پیار بھرے افسانے کو
اک شمع جلی بجھنے کے لیے اک پھول کھلا مرجھانے کو
تمہاری انجمن سے اٹھ کے دیوانے کہاں جاتے
جو وابستہ ہوئے تم سے وہ افسانے کہاں جاتے

کلیم عاجز

ہے انہیں دو ناموں سے ہر ایک افسانے کا نام
ایک تیرا نام ہے اک تیرے دیوانے کا نام
مری مستی کے افسانے رہیں گے
جہاں گردش میں پیمانے رہیں گے
جنہیں گلشن میں ٹھکرایا گیا ہے
انہی پھولوں کے افسانے رہیں گے

کیفی اعظمی

سنا کرو مری جاں ان سے ان سے افسانے
سب اجنبی ہیں یہاں کون کس کو پہچانے

ناصر کاظمی

مٹی مٹی سی امیدیں تھکے تھکے سے خیال
بجھے بجھے سے نگاہوں میں غم کے افسانے
کتنے رنگا رنگ مسافر شانہ بہ شانہ رقص کناں
چھوڑ گئے کتنے افسانے انٹر کانٹی نینٹل میں