داغ دہلوی

میں وہ بشر کہ مجھ سے ہر آدمی کو نفرت
تم شمع وہ کہ تم پر پروانے آدمی ہیں

مصحفی غلام ہمدانی

جی جھونکتا ہے کوئی آتش میں ناحق اپنا
جلتے ہیں شمع پر جو پروانے باؤلے ہیں

یگانہ چنگیزی

سلسلہ چھڑ گیا جب یاسؔ کے افسانے کا
شمع گل ہو گئی دل بجھ گیا پروانے کا
خلوت ناز کجا اور کجا اہلِ ہوس
زور کیا چل سکے فانوس سے پروانے کا
لاش کم بخت کی کعبے میں کوئی پھکوا دے
کوچۂ یار میں کیوں ڈھیر ہو پروانے کا
آپ اب شمعِ سحر بڑھ کے گلے ملتی ہے
بخت جاگا ہے بڑی دیر میں پروانے کا
آگ میں کود پڑا دل کی لگی وہ شے ہے
آتش شوق کو پوچھے کوئی پروانے سے
اور پردے کی ملاقات کرے گی اندھیر
شمع کیوں چھپتی ہے فانوس میں پروانے سے

باقی صدیقی

بہار انجمن شب میں اب وہ بات کہاں
ہزار شمع جلے ، لاکھ آئیں پروانے

عبدالحمید عدم

ہیں عدمؔ کے ذکر پر کیوں آپ اتنے پر غضب
شمع کے ہم راہ آ جاتا ہے پروانے کا نام

قمر جلالوی

حسن سے رسوا نہ ہو گا اپنے دیوانے کا نام
شمعِ رو دے گی مگر نہ لے گی پروانے کا نام
حسن مجبورِ ستم ہے عشق مجبورِ وفا
شمع کو سمجھائیں یا سمجھائیں پروانے کو ہم
کمالِ حسن بناتا ہے عشق کو دشمن
فروغِ شمع سے جلنے لگے ہیں پروانے
یہ عشق ہے جسے پروا حسن کی بھی نہیں
کہ شمعِ روتی ہے اور سو رہے ہیں پروانے
چھپائیں گے کہاں تک رازِ محفل شمع کے آنسو
کہے گی خاکِ پروانہ کہ پروانے پہ کیا گزری

احمد راہی

پھر کسی جشن چراغاں کا گماں ہے شاید
آج ہر سمت سے پر سوختہ پروانے چلے

جلیل مانک پوری

شمع معشوقوں کو سکھلاتی ہے طرز عاشقی
جل کے پروانے سے پہلے بجھ کے پروانے کے بعد

خاطر غزنوی

اس کو کیا کہیے کہ ہم ہر حال میں جلتے رہے
دوریوں میں چاند تھے قربت میں پروانے ہوئے

سیماب اکبر آبادی

نہ ہو جو زندگی انجام وہ وجدان ناقص ہے
حضور شمع بعد وجد پروانے پہ کیا گزری
تو اپنے ہی مآل سوزِ غم پر غور کر پہلے
تجھے اس سے نہیں کچھ بحث پروانے پہ کیا گزری
زباں منہ میں ہے عرضِ حال کر تو نے تو دیکھا ہے
کہ خوئے ضبط و خاموشی سے پروانے پہ کیا گزری

فانی بدایونی

حسن ہے ذات مری عشق صفت ہے میری
ہوں تو میں شمع مگر بھیس ہے پروانے کا

فراق گورکھپوری

جل بجھنے کی بھی توفیق کہاں عشاق کی قسمت میں
اک ان دیکھی شمع بزم کے دل والے پروانے ہیں

قتیل شفائی

اک ساتھ فنا ہو جانے سے اک جشن تو برپا ہوتا ہے
یوں تنہا جلنا ٹھیک نہیں سمجھائے کوئی پروانے کو

کلیم عاجز

تجھ سے روشن ہے چراغ محفل دار و رسن
مجھ سے بھی اس دور میں زندہ ہے پروانے کا نام

مجروح سلطان پوری

یہ آگ اور نہیں دل کی آگ ہے ناداں
چراغ ہو کہ نہ ہو جل بجھیں گے پروانے

نوح ناروی

چراغِ انجمن اپنی ضیا پھیلانے والا ہے
اٹھا کر شعلۂ الفت کو پروانے میں رکھ دینا