داغ دہلوی

تجھے تو وعدۂِ دیدار ہم سے کرنا تھا
یہ کیا کیا کہ جہاں کو امیدوار کیا
وعدہ کرتے نہیں یہ کہتے ہیں
تجھ کو امیدوار کون کرے

مصحفی غلام ہمدانی

تمہارے وعدوں پہ ہم کو تو اب نہیں ٹھہراؤ
مگر نیا کوئی امیدوار ٹھہرے گا
کوچے میں ترے مری نگہ کا
ہر گوشہ امیدوار ہے اور
غزل اک اور بھی اے مصحفیؔ سنا دے تو
کوئی کہے نہ کہ بندہ امیدوار رہا

مصطفٰیٰ خان شیفتہ

جور و جفا بھی غیر پر اے یار دل شکن
کچھ بھی خیال ہے دلِ امیدوار کا

مومن خان مومن

کیا شبِ انتظار ہونا تھا
ناحق امیدوار ہونا تھا
سمجھ لیا مگر اس سبز رنگ کو طوطی
کہ ہے نظارے کا امیدوار آئینہ

یگانہ چنگیزی

خزاں کے آتے ہی گلچیں نے پھیر لیں آنکھیں
کسی سے کوئی وفا کا امیدوار نہ ہو
بہار آئی ہے گھٹ گھٹ کے جان دے بلبل
قفس میں نکہتِ گل کی امیدوار نہ ہو
ساقی گرا نہ دیجیو یہ جام آخری
دل ٹوٹ جائے گا کسی امیدوار کا
نگاہِ لطف سے ساقی ہمیں رہیں محروم
ادھر بھی دیکھ اک امیدوار باقی ہے
جواب دے کے نہ توڑو کسی غریب کا دل
بلا سے کوئی سراپا امیدوار رہے

فانی بدایونی

جھوٹ ہی سہی وعدہ کیوں یقیں نہ کر لیتے
بات دل فریب ان کی دلِ امیدوار اپنا
خیر تو ہے کہ آپ کے در سے
آج فانیؔ امیدوار آیا
میں غم نصیب وہ مجبور شوق ہوں فانیؔ
جو نامراد جیے اور امیدوار رہے
کرم ہے راز امیدِ کرم کی ہستی کا
امید تیرے کرم کی امیدوار ہوئی
ان کی بے مہریوں کو کیا معلوم
کوئی امیدوار تھا نہ رہا

امیر مینائی

میں ہوں‌ نامراد ایسا کہ بلک کے یاس روتی
کہیں پا کے آسرا کچھ جو امیدوار ہوتا

شاذ تمکنت

وہ گداگران جلوہ سرِ رہ گزار چپ تھے
جنہیں تجھ سے تھیں امیدیں وہ امیدوار چپ تھے