داغ دہلوی

ہاتھ رکھ کر وہ اپنے کانوں پر
مجھ سے کہتے ہیں ماجرا کہیے

مصحفی غلام ہمدانی

وہ آرزو نہ رہی اور وہ مدعا نہ رہا
ہمارے آپ کے ہرگز وہ ماجرا نہ رہا

میر مہدی مجروح

دکھ جو مجروحؔ نے سہے غم سے
اس کا کیا شرح ماجرا کیجے

باقی صدیقی

سو گئے دل کا ماجرا سنتے
رات بھر کیا صدائے پا سنتے

جون ایلیا

اب تو مشکل ہے زندگی دل کی
یعنی اب کوئی ماجرا ہی نہیں
غم ہے بے ماجرا کئی دن سے
جی نہیں لگ رہا کئی دن سے

عرفان صدیقی

تھا مرے باطن میں کوئی قصہ گو‘ وہ کون تھا
مجھ سے اک طرفہ حکایت ماجرا کرتا تھا رات
چھپانے سے کیا فائدہ لکھنے والے
کہ لکھ دیں گے سب ماجرا لکھنے والے

اختر شیرانی

کس کو دیکھا ہے یہ ہوا کیا ہے
دل دھڑکتا ہے ماجرا کیا ہے

عالم تاب تشنہ

اسیر دشتِ بلا کا نہ ماجرا کہنا
تمام پوچھنے والوں کو بس دعا کہنا
میں نے صف آرا کیا اک مجمع شوریدہ سر
کج کلاہ شہر کو بے ماجرا میں نے کیا

جوش ملیح آبادی

ہر سانس میں ہے چشمۂ حیوان و سلسبیل
پھر بھی میں تشنہ کام ہوں یہ ماجرا نہ پوچھ
ہاں اے خدائے عرش بریں و بتان فرش
تم میں سے ہو کوئی تو مرا ماجرا سنے

حسرت موہانی

حسن کا ناز عاشقی کا نیاز
اب تو کچھ بھی وہ ماجرا نہ رہا
خبر ان کو اب تک نہیں مر مٹے ہم
دلِ زار کا ماجرا کہتے کہتے

فراق گورکھپوری

جدا آغاز سے انجام سے دور
محبت اک مسلسل ماجرا ہے

ناصر کاظمی

لہو رو کے سینچا ہے ہم نے چمن کو
ہر اک پھول کا ماجرا جانتے ہیں