داغ دہلوی

اس سے اٹھے گی کیا مصیبت عشق
ابتدا کو جو انتہا جانے

مرزا رفیع سودا

ترا غرور مرا عجز تا کجا ظالم
ہر ایک بات کی آخر کچھ انتہا بھی ہے

باقی صدیقی

وفا کا زخم ہے گہرا تو کوئی بات نہیں
لگاؤ بھی تو ہمیں ان سے انتہا کا تھا

جون ایلیا

ملتے رہیے اسی تپاک کے ساتھ
بے وفائی کی انتہا کیجے
کیا مہ و سال ماجرا ایک پلک تھی جو میاں
بات کی ابتدا بھی تھی بات کی انتہا بھی تھی

جگر مراد آبادی

تجھی سے ابتدا ہے تو ہی اک دن انتہا ہو گا
صدائے ساز ہو گی اور نہ ساز بے صدا ہو گا
بے کراں ہوتا نہیں بے انتہا ہوتا نہیں
قطرہ جب تک بڑھ کے قلزم آشنا ہوتا نہیں
وہ کافر آشنا نا آشنا یوں بھی ہے اور یوں بھی
ہماری ابتدا تا انتہا یوں بھی ہے اور یوں بھی

عبدالحمید عدم

محتاط و ہوشیار تو بے انتہا ہوں میں
عمداً ترا فریبِ نظر کھا گیا ہوں میں
بانکپن میں اور کوئی شے نہیں
سادگی کی انتہا موجود ہے

مجید امجد

جو شکوہ اب ہے ، یہی ابتدا میں تھا امجد
کریم تھا، مری کوشش میں انتہا رکھتا

الطاف حسین حالی

خوبیاں اپنے میں گو بے انتہا پاتے ہیں ہم
پر ہر اک خوبی میں داغ اک عیب کا پاتے ہیں ہم

احسان دانش

ہے تیرے کافر شباب سے خوب میری معصوم مے گساری
سرور کی ایک حد ہے قائم غرور کی انتہا نہیں ہے
ڈرو خدا سے بڑا بول بولنے والو
قریب ہم سے بھی بے انتہا رہا ہے کوئی

ادا جعفری

سو سو طرح لکھا تو سہی حرفِ آرزو
اک حرفِ آرزو ہی مری انتہا ہے کیا

عبید اللہ علیم

کمال آدمی کی انتہا ہے
وہ آئندہ میں بھی سب سے بڑا ہے

ماجد صدیقی

صورت خار دے چبھن، صورت گل کھلا مجھے
تجھ پہ ہے اب یہ فیصلہ، چاہیے انتہا مجھے

جلیل مانک پوری

ابھی سے آفتِ جاں ہے ادا ادا تیری
یہ ابتدا ہے تو کیا ہو گی انتہا تیری

ثروت حسین

کسی کی نیم نگاہی کا جل رہا ہے چراغ
نگار خانۂ آغاز و انتہا سے ادھر

جوش ملیح آبادی

اس بات کی نہیں ہے کوئی انتہا نہ پوچھ
اے مدعائے خلق مرا مدعا نہ پوچھ

حفیظ جالندھری

قصۂ قیس سن کے فرمایا
جھوٹ کی کوئی انتہا ہی نہیں

سیماب اکبر آبادی

بقدرِ شوق اقرارِ وفا کیا
ہمارے شوق کی ہے انتہا کیا
نہ اس پر اختیار اپنا نہ اس پر
سر آغاز و فکر انتہا کیا

فانی بدایونی

دل ہمیں ہوا حاصل درد میں فنا ہو کر
عشق کا ہوا آغاز غم کی انتہا ہو کر
میرے لب پر کوئی دعا ہی نہیں
اس کرم کی کچھ انتہا ہی نہیں
نہ ابتدا کی خبر ہے نہ انتہا معلوم
رہا یہ وہم کہ ہم ہیں سو وہ بھی کیا معلوم

اکبر حمیدی

کچھ عشق و عاشقی پہ نہیں میرا اعتقاد
میں جس کو چاہتا تھا حسیں انتہا کا تھا

احمد فراز

رہِ وفا میں کوئی آخری مقام نہیں
شکستِ دل کو محبت کی انتہا نہ سمجھ
سلسلے جو وفا کے رکھتے ہیں
حوصلے انتہا کے رکھتے ہیں
میں مر مٹا تو وہ سمجھا یہ انتہا تھی مری
اسے خبر ہی نہ تھی، خاک کیمیا تھی مری
شکایت اس کی نہیں ہے کہ اس نے ظلم کیا
گلہ تو یہ ہے کہ ظالم نے انتہا نہیں کی

قیوم نظر

یہی اڑتا ہوا لمحہ رہے گا
عبث ہے ابتدا کیا انتہا کیا

محسن نقوی

پیماں وفا کے باندھ مگر سوچ سوچ کر
اس ابتدا میں یوں نہ سخن انتہا کے لا

ناصر کاظمی

یہ کیا کہ روز ایک سا غم ایک سی امید
اس رنجِ بے خمار کی اب انتہا بھی ہو