شیخ ابراہیم ذوق

لائی حیات آئے قضا لے چلی چلے
اپنی خوشی نہ آئے نہ اپنی خوشی چلے
دنیا نے کس کا راہِ فنا میں دیا ہے ساتھ
تم بھی چلے چلو یوں ہی جب تک چلی چلے

فیض احمد فیض

میخانے کی رونق ہیں کبھی خانقہوں کی
اپنا لی ہوس والوں نے جو رسم چلی ہے

جون ایلیا

میں جو تھا اس گلی کا مست خرام
اس گلی میں مری چلی ہی نہیں
گرد فشاں ہوں دشت میں سینہ زناں ہوں شہر میں
تھی جو صبائے سمت دل جانے کہاں چلی گئی
جس میں تھا سوز آرزو اس کا
شبِ غم وہ ہوا چلی کب تک
جونؔ جنوب زرد کے خاک بسر یہ دکھ اٹھا
موج شمال سبز جاں آئی تھی اور چلی گئی

قمر جلالوی

سانس ان کے مریضِ حسرت کی رک رک کے چلی جاتی ہے
مایوس نظر ہے در کی طرف اور جان نکلی جاتی ہے

ادا جعفری

کیا جانیے کس بات پہ مغرور رہی ہوں
کہنے کو تو جس راہ چلایا ہے چلی ہوں
دل کو تو یہ کہتے ہیں کہ بس قطرۂ خوں ہے
کس آس پہ اے سنگ سرِ راہ چلی ہوں

علی سردار جعفری

شاخِ گل ہے کہ یہ تلوار کھنچی ہے یارو
باغ میں کیسی ہوا آج چلی ہے یارو
کون ہے خوف زدہ جشن سحر سے پوچھو
رات کی نبض تو اب چھوٹ چلی ہے یارو
چوم لینا لبِ لعلیں کا ہے رندوں کو روا
رسم یہ بادۂ گلگوں سے چلی ہے یارو

ماجد صدیقی

دیکھا تھا جو دکھ عروج پر بھی
اب شام اسی کی ڈھل چلی ہے

خاطر غزنوی

جب اس زلف کی بات چلی
ڈھلتے ڈھلتے رات ڈھلی
اب کے بھی وہ دور رہے
اب کے بھی برسات چلی

قتیل شفائی

نئے اک شہر کو صبح سفر کیا لے چلی مجھ کو
صدائیں دے رہی ہے ایک چھوٹی سی گلی مجھ کو

ناصر کاظمی

سارا دن تپتے سورج کی گرمی میں جلتے رہے
ٹھنڈی ٹھنڈی ہوا پھر چلی سو رہو سو رہو
دل میں اک لہر سی اٹھی ہے ابھی
کوئی تازہ ہوا چلی ہے ابھی
خیر تجھے تو جانا ہی تھا
جان بھی تیرے ساتھ چلی ہے
سو گئی شہر کی ہر ایک گلی
اب تو آ جا کہ رات بھیگ چلی
پھر ساون رت کی پون چلی تم یاد آئے
پھر پتوں کی پازیب بجی تم یاد آئے
ہم ادھر گھر میں ہو گئے بے چین
دور آندھی چلی درختوں میں
آج پھر دیر کی سوئی ہوئی ندی میں نئی لہر آئی
دیر کے بعد کوئی ناؤ چلی ہم نفسو شکر کرو