مرزا غالب

یاس و امید نے اک عربدہ میداں مانگا
عجزِ ہمت نے طلسمِ دلِ سائل باندھا

امام بخش ناسخ

سب کے خالق نے بنائے کاسۂِ سر واژگوں
آدمی اس پر بھی پیش آدمی سائل ہوا

بہادر شاہ ظفر

ہے مجھے بعد از سوال بوسہ خواہشِ وصل کی
یہ تمنا ایک اس سائل کے دل میں اور ہے

حیدر علی آتش

خدمت یار میں میں جب کہ ہوں سائل جاتا
کچھ نہ کچھ بوسہ و دشنام سے ہے مل جاتا
راہ میں شانِ کریمی ہے تری بھر دیتی
پھر کے خالی کسی در سے جو ہے سائل جاتا

داغ دہلوی

جھڑکتے ہو مجھے کیوں دور ہی سے پاس آنے دو
بڑھا کر ہاتھ دل دیتا ہوں تم سمجھے ہو سائل ہے
مثال گنج قاروں اہل حاجت سے نہیں چھپتا
جو ہوتا ہے سخی خود ڈھونڈ کر سائل سے ملتا ہے

مصحفی غلام ہمدانی

کوئی اے مصحفیؔ اس سے یہ کہہ دے
دعا دیتا تجھے سائل گیا ہے
مزہ ملے ہے مجھے اس کی ہم کلامی کا
میں اس کے در کے جو سائل سے بات کرتا ہوں
جھمکے دکھا کے اس کو تو نے جو منہ دکھایا
مر ہی گیا نہ تیرا سائل تڑپ تڑپ کر

مصطفٰی خان شیفتہ

میں جاں بہ لب ہوں اور خبرِ وصل جاں طلب
کیا کیا نہیں دہندہ و سائل کو اضطراب

مومن خان مومن

مت مانگیو امان بتوں سے کہ ہے حرام
مومنؔ زبان بے ہودہ سائل کو تھامنا

اسرار الحق مجاز

وہاں کتنوں کو تخت و تاج کا ارماں ہے کیا کہیے
جہاں سائل کو اکثر کاسۂ سائل نہیں ملتا

علی سردار جعفری

جانیے دولتِ کونین کو بھی جنس حقیر
اور در یار پہ اک بوسے کے سائل رہیے