شیخ ابراہیم ذوق

بادام دو جو بھیجے ہیں بٹوے میں ڈال کر
ایماں یہ ہے کہ بھیج دے آنکھیں نکال کر
دل سینے میں کہاں ہے نہ تو دیکھ بھال کر
اے آہ کہہ دے تیر کا نامہ نکال کر
تصویر ان کی حضرتِ دل کھینچ لیجے گر
رکھ دیں گے ہم بھی پاؤں پہ آنکھیں نکال کر

مرزا رفیع سودا

ارباب فہم آگے وہ صاحب ہنر ہے
کینہ کسی کے دل سے جس کو نکال آیا

باقی صدیقی

درد اٹھا کچھ اس طرح باقیؔ
دل کی سب حسرتیں نکال گیا

عبدالحمید عدم

آیا ہوں یوں بچا کے حوادث سے زیست کو
لاتے ہیں جیسے کوہ سے چشمہ نکال کر
ہے اگر قتلِ عام کی نیت
جسم کی چھب نکال کر چلئے

اختر حسین جعفری

کیا مکاں خوردہ خلائق میں چلے اس کا خیال
تنگ ہائے شہر کچھ رستہ نکال اس کے لیے

عالم تاب تشنہ

ہیں یہ جسم و جاں کی قیود کیا خد و خال کے یہ حدود کیا
میں ہوں عکس منظر ماورا مجھے آئنوں سے نکال دے

عبید اللہ علیم

سخن میں سہل نہیں جاں نکال کر رکھنا
یہ زندگی ہے ہماری سنبھال کر رکھنا

جلیل مانک پوری

ہم تو قصوروار ہوئے آنکھ ڈال کے
پوچھو کہ نکلے کیوں تھے وہ جوبن نکال کے
دل میں وہ بھیڑ ہے کہ ذرا بھی نہیں جگہ
آپ آئیے مگر کوئی ارماں نکال کے
لذت یہی کھٹک کی جو ہے راہِ عشق میں
رکھ لوں گا دل میں پاؤں کے کانٹے نکال کے
سنیے تو اک ذرا مرے اشعار دردناک
لایا ہوں میں کلیجے کے ٹکڑے نکال کے

رسا چغتائی

سخت مشکل ہے آئنوں سے رساؔ
واہموں کو نکال کر رکھنا

احمد فراز

ہم یہاں بھی نہیں ہیں خوش لیکن
اپنی محفل سے مت نکال ہمیں
نہیں ہے تاب تو پھر عاشقی کی راہ نہ چل
یہ کارزار جنوں ہے جگر نکال کے رکھ

قتیل شفائی

ہر آنگن میں آئے تیرے اجلے روپ کی دھوپ
چھیل چھبیلی رانی تھوڑا گھونگھٹ اور نکال
بیچ میں رنگ محل ہے تیرا کھائی چاروں اور
ہم سے ملنے کی اب گوری تو ہی راہ نکال

کلیم عاجز

ہماری آشفتگی سلامت سلجھ ہی جائے گی زلف دوراں
جو پیچ و خم رہ گیا ہے باقی وہ پیچ و خم بھی نکال دیں گے
جنابِ شیخ اپنی فکر کیجے کہ اب یہ فرمان برہمن ہے
بتوں کو سجدہ نہیں کرو گے تو بت کدے سے نکال دیں گے

محبوب خزاں

زخم بگڑے تو بدن کاٹ کے پھینک
ورنہ کانٹا بھی محبت سے نکال

محسن نقوی

شاید کسی نے بخل زمیں پر کیا ہے طنز
گہرے سمندروں سے جزیرے نکال کر